PN Tenke Aseita Pedidu Governu ho Montante Millaun $286.8 Tempotimor (Dili)- Deputadu husi bankada Partidu Demokrátiku (PD), Adriano do Nascimento konsidera pedidu levantamentu estraordinariu Fundu Petrolíferu husi governu ne’e importante no urjeten, tanba ne’e, Parlamentu Nasionál tenke aseita.

"Hau hanoin ita tenke aseita malu, tana, Covid-19 mak lori impedimentu ba reseit. Nune'e, halo presu mina tun kuaze atu to’o kedan zero. Ne'e la'ós governu ida ne'e nia hakarak, maibé, ne'e impaktu no ita mós tenke aseita katak, Covid-19 ninia impaktu ba reseita doméstika kada nasaun, inklui Timor-Leste", dehan Adriano iha Parlamentu Nasionál, segunda (15/06).

Nia dehan, Timor-Leste mós tenke aseita malu, katak, impase politika ne'ebé naruk lori TL ba xumba Orsamentu Jerál Estadu (OJE) no lori ba susar finansiamentu ba mákina estadu to’o uza deit osan duadesimu. Tanba ne'e, nia fó solusaun katak, tenke foti duni osan mina nian maske reseita la iha, tanba la iha dalan no ida seluk estadu tenke hanoin duni halo intervensaun hodi rekopera ekonomia nasaun ida nian.

"Ba ha’u, urjente tanba cash iha tizouru la to'o ona millaun $200. Nune'e, kuandu governu la husu osan aumenta mak governu la tuir ona Lei. Tanba, Lei hateten, osan ne'e iha mala laran tenke millaun $200, se la to'o mak governu urjentemente mai husu Parlamentu Nasional atu halo kompletu", nia esplika.

Tanba ne’e, Adriano husu Parlamentu Nasionál labele dada naruk hodi diskute, maibé presiza aseita hodi rezolve problema ne'ebe nasaun infrenta. Entretantu, governu husu ona ba Parlamentu Nasionál atu halo levantamentu estraordinéria ba fundu petrolifeiru ho montante millaun $286.8.