"Ohin simu ona subsídiu sente kontente. Ha’u sei hola fos, mina no balun rai ba oan sira nia eskola. Iha fulan ida ne'e mak Corona mai tan, ha’u bele moris ona tanba osan rezerva iha ona”, António hateten ba TempoTimor.com iha Sede Suku Komoro Tersa (09/06).
António konta tuir katak, durante estadu emerjénsia dala tolu tutuir malu, nia laiha kbiit atu hola hahan maski nia faan kafé no sasan kios nian, maibé la folin, nune’e ho osan $200 ne’ebé simu ona, sei hakmaan naha todan ne’ebé iha.
Entretantu, António Soares orijen mai-husi munisípiu Ermera, no oras ne'e hela iha aldeia 30 Setembru suku Komoro, postu administrative Dom Aleixo munisipiu Dili.
António ne’ebé alezadu desde tinan 1999, nia kaben servisu hanesan cleaner iha Ospitál Nasionál Guido Valadares ho saláriu $115.00 kada fulan, hodi sustenta nia oan na'in tolu, feto rua mane ida.