Tuir loloos espozisaun Dubai sei realiza iha tinan ida ne’e no Timor-Leste deside ona hodi partisipa iha eventu internasional ne’e, maibé tanba pandemia Corona Virus Disease 2019 (Covid-19) ne’ebé fó ameasa ba umanu, expo Dubai 2020 adia ba tinan oin.
Koordenadór Programa Expo Dubai TL, Arif Abdullah Sagran dehan, iha tinan kotuk TL deside ona hodi partisipa iha expo Dubai 2020.
Maibé, tanba pandemia Covid-19, autoridade sira iha Dubai muda espozisaun refere ba tinan oin.
"Iha tinan kotuk, Timor-Leste deside ona hodi partisipa iha expo Dubai iha 2020, maibé tanba situasaun Covid-19, entaun iha Dubai ne'ebá mós muda ba tinan oin 2021," informa Arif hafoin enkontru ho Ministru Prezidensia Konsellu Ministru (MPKM) Fidelis Manuel Leite Magalhães iha Palásiu Governu, Sesta (05/06).
Nia dehan, TL halo ona preparasaun lubuk ida hodi partisipa iha expo Dubai.
"Ita la espera "kebetulan" sira fó fatin mai Timor-Leste, espasu ida ne'ebé luan ka médida 250 metru kuadradu, entaun sasan ne'ebé ita atu tau iha fatin ne'ebá ita prepara hotu ona," nia dehan.
Ba partisipasaun TL iha expo Dubai, nia hatete, sei iha parte lima importante mak hanesan National Day, Goverment Summit, Kulinária, Exibition no ikus liu Tee Coffe Day.
Entretantu, tuir planu, expozisaun refere sei hala'o durante fulan neen, hahú husi 1 Outubru 2021 to'o 31 Marsu 2022.
“Iha fulan neen nia laran ne'e lorloron sei iha selebrasaun National Day, no promove riku-soin TL nian, produtu lokál sira ne'ebé iha Timor-Leste liu husi expozisaun, kulinária no seluk tan.
Kona-ba montante orsamentu ne’ebé aloka ba ekipa TL hodi partisipa iha expo Dubai, nia dehan, orsamentu ne’ebé aloka hamutuk tokon $2.
