“Kustu manutensaun ne’e aas, entaun liuhusi programa ne’e oinsa atu prevene liuhusi informasaun ka fahe koñesimentu ba kondutór sira, tanba sira mak lori hela kareta Estadu”, dehan Diterora Nasional Monitorizasaun Jestaun Patrimóniu Estadu, Timótia Pompeia, iha salaun Diresaun Nasional Transporte Telekomunikasaun, Balidi, Tersa (19/2).
Programa ne’e fó kapasitasaun ba kondutór sira, tanba sira ne’ebé lori kareta estadu ne’e parte ida kontribui maka’as ba despeza manutensaun ninian. Ne'e duni oinsa mak prevene labele estragu barak.
“Matéria ne'e ko’alia liu kona-ba sansaun kriminal no halo nusa mak iha prátika bainhira utiliza estrada públiku. Kondutór hotu-hotu hanesan karreta Estadu ka privadu hotu bele kumpri regra ne’ebé mak iha estrada públika, atu bele respeita ema hotu nian interese”, tenik Xefe Departamentu Jestaun Kontra Ordenasaun, Diresaun Nasional Seguransa Rodoviáriu, Alipio José Vieira.
Tuir nia, koñesimentu kondutór sira-nian minímu tebes, tanba sira iha formasaun balun maibé ladun kle’an bainhira sira ba hasai karta Kondusaun.
Entretantu, kondutór Filomeno Ximenes da Conceição, husi Tribunal Rekursu, agradese tanba bele hetan formasaun ne’ebé bele fó hanoin ba kondutór no motorista Estadu hodi hatene sira ninia responsabilidade iha servisu fatin.