Konsellu Ministru aprova projetu Dekretu-Lei, ne’ebé aprezenta husi Ministru Koordenadór Asuntu Ekonómiku, Fidelis Manuel Leite Magalhéies no husi Governadór husi Banku Sentrál Timor-Leste (BCTL), Abraio de Vasconcelos.
"Sistema garantia kréditu ne'e polítika governu nian atu apoiu ita-nia empreza ki'ik sira liu-liu ita-nia sidadaun sira ne'ebe halo ekonomia barak liu iha setór informál no halo negósiu ki'ik sira hanesan kioske sira ne'ebe ki'ik, nune'e ita kolabora ho Banku Sentrál atu bele ajuda ninia implentasaun hodi bele koordena ka orienta ba emprezariu no instituisaun finanseiru sira ne'ebé hola parte", dehan Fidelis, iha Edifísiu Ministériu Finansas, Ai-Tarak Laran, Kuarta (29/4).
VIDEO PUBLISIDADE APELU HUSI PM TAUR APLAUS BA FRONT LINE
Konselu Ministru aprova alterasaun ne'e kona-ba alterasaun dahuluk ba Dekretu-Lei n.° 23/2017, loron 12 fulan-Jullu, kona-ba Sistema Garantia Kréditu.
Ho alterasaun ne’e haluan liutan asesu sistema garatia kréditu ba mikro-empreza sira atu hasae tipu ba atividade ekonómiku sira ne’ebé tenke elejivel ba programa ne'e rasik.
Sistema garatia kréditu hanesan mekanizmu ida husi apoiu ba mikro no ba empreza ki'ik no empreza médiu sira, ho nune’e Estadu fahe risku husi konsesaun kréditu ho banku komersiál sira, atu fó garantia ho montante másimu 70% husi empréstimu ne’ebé hetan no kumpre rekizitu legál sira ne’ebé estabelese ona.
Objetivu prinsipál husi sistema garantia kréditu mak atu fó kontribuisaun ba grupu emprezariu sira atu sólido no viével, ho nune'e bele favorese ba emprendedór sira ba kriasaun postu traballu no kresimentu ekonomia nasionál. (*)