Governu Deside Adia Pagamentu Impostu ba Empreza sira Durante Fulan 3

Ministra Finansas, Sara Lobo Brites ko'alia ba Jornalista sira iha momentu ruma liu ba kotuk Ministra Finansas, Sara Lobo Brites ko'alia ba Jornalista sira iha momentu ruma liu ba kotuk Foto File

Tempotimor (Dili)-Relasiona ho implementasaun estadu emerjensia ba prevensaun Corona Virus Deasses 2019 (Covid-19), governu Timor-Leste foti desizaun hodi adia pagamentu impostu to'o fulan tolu.

Ministra Ministra Finansas interina Sara Lobo Brites hatete, MF liu husi autoridade tributaria sei adia pagamentu impostu husi emprezariu sita to'o fulan Maiu.

"Médida balun ne'ebé husi Ministériu Finansas halo mak liu husi autoriedade tributária hasai ona sirkular katak empreza sira bele difere sira-nia pagamentu ba impostu ka sira-nia obrigasaun ba impostu ne'e bele adi'a ninia pagamentu to'o fulan tolu, signifika husi Marsu to'o Maiu," dehan Ministra Finansas interina Sara Lobo Brites iha PN, Sesta (03/04/2020).

Tuir Ministra ne'e, iha situasaun hanesan daudauk ne'e la nesesariu atu empreza sira selu sira-nia obrigasaun ba impostu.

"Sira la nesesáriu ba obrigasaun impostu tanba ita-nia lei mós fó dalan, bainhira sira entrega sira nia relatóriu mak durante fulan hira sira laiha reseita sira laiha obrigasaun atu selu impostu ruma. Entaun husi parte ne'e ita hakman ona katak empreza labele sai vítima ba estadu emerjénsia ne'e," dehan MF.

Desizaun ida ne'e, nia dehan, klaru afeta ba reseita estadu nian, maibé governu nia preokupasaun mak oinsa empreza sira iha nafatin kbiit hodi selu sira-nia trabaladór.

"Ita-nia preokupasaun mak oinsa sira nafatin iha kbiit hodi selu nafatin sira-nia traballadór, ita la preokupa fali selu impostu, tanba ne'e mak situasaun la'o nafatin," dehan Sara.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.