Se PN Aseita, Governu sei Selu Funsionariu Setór Privadu

Ministra Finansas Interina Sara Lovbo Brites iha Konsellu Ministru Extraordinaria iha loron hirak ba kotuk Ministra Finansas Interina Sara Lovbo Brites iha Konsellu Ministru Extraordinaria iha loron hirak ba kotuk Foto Midia PM

Tempotimor (Dili)-Governu iha planu atu apoiu setor privadu sira hodi bele kontinua selu sira-nia funsionariu ne'ebé la hala'o serbisu durante tempu estadu emerjensia. Maibé, planu ida ne'e so bele realiza bainhira Parlamentu Nasionál aseita.

Situasaun estadu emerjensia ne'ebé estadu Timor-Leste aplika fó impaktu mós ba rendimentu funsionariu sira ne'ebé serbisu iha kompaña privadu sira.

Ho situasaun emerjensia ida ne'e, kompaña privadu sira mós suspende provizoriu sira-nia atividade, ne'ebé fó mós impaktu ba sira-nia rendimentu, ho nune'e kompaña balun iha posibilidade atu la selu sira-nia funsionariu.

Ba kestaun ne'e, governu planeia atu apoiu setór privadu sira hodi bele selu sira-nia funsionariu durante estadu emerjensia.

Ministra Finansas interina Sara Lobo Brites hatete, governu hakarak asegura seitor privadu sira atu kontinua selu sira-nia funsionariu durante estadu emerjensia, maibé presiza mós apoiu husi Parlamentu Nasionál.

"Se ita iha situasaun defisil hanoin atu halo intervensaun ba ekonomia seitor privadu sira importante, tanba ita hakarak asegura katak seitor privadu sira kontinua selu sira-nia funsionariu embora governu dekreta ona estadu emerjensia, maibé seitor privadu sira atu halo ida ne'e presiza mós apoiu husi governu," dehan ministra Sara hafoin reuniaun Konsellu Ministru iha Sentru Konvensaun Dili, Sabadu (28/03).

Tanba ne'e, nia hatete, governu aprezenta ona orsamentu hamutuk millaun $100 ba Parlamentu Nasionál, ne'ebé inklui mós osan atu apoiu setor privadu sira.

"Tanba ne'e pakote ne'ebé ohin entrega (ba PN) inklui ona hanoin balun atu halo intervensaun ho forma ida hanesan ne'e," dehan ministra ne'e.

Nia afirma, governu iha hanoin atu halo intervensaun ba ekonomia seitor privadu sira hodi bele kontinua selu sira-nia funsionariu, maibé depende ba parlamentu nasional aseita ka lae.

"Atu halo intervensaun ba ekonomia seitor privadu sira, primeiru hato'o lai ba parlamentu nasional aprova tiha lai osan, tanba laiha osan governu labele halo buat ida, tanba ita iha duadesimu, se parlamentu nasional aprova konserteza ninia implementasaun ne'e governu ho banku sentral tenke defini oinsa atu implementa," dehan nia.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.