"Konselu Ministru aprova rezolusaun ida kona-ba polítika hodi redús impaktu negativu ba ekonomia durante krize, tempu emerjénsia no faze rekuperasaun see bainhira ita tama iha emerjénsia Covid-19", dehan Ministru Reforma Lejizlativu Asuntu Parlamentár (MRLAP) Fidelis Leite Magalhães, hafoin reuniaun Konsellu Ministru, iha Sentru Konvensaun Dili (CCD), Kuarta (25/3). 

Nia subliña, iha dokumentu ne'e nia konteúdu fahe ba rua, primeiru ba medida sira ne'ebe governu sei hola tempu tuir mai bainhira tempu ne'e to'o. See tempu emerjénsia iha oinsá atu hola medida. 

"Medida sira ohin aprova iha Konsellu Ministru mak ita sei garante kontinuidade ba distribuisaun fornesimentu ba sasán esensiál no hahán ka alimentasaun, medikamentu klínika nian, buat hirak ne'e governu sei garante iha tempu krize no durante rekuperasaun", nia haktuir 

Governante ne'e, reforsa liután, governu sei garante mos ligasaun ba liur husi aviasaun no maritima, ida ne'e atu garante lori sasán esensiál sira hanesan medikamentu, rezultadu teste ba amostra no bele lori espesialista sira husi li'ur mai bainhira presiza. 

Ida seluk, bainhira situasaun emerjénsia karik oinsa atu garante bee, eletrisidade no dalan oinsá? Governu bele komunika ba sidadaun sira mak liuhusi Timor Telecom, Telekomcel no Telemor, buat hirak ne'e presiza medida preventiva ka antesipa saida mak sei bele akontese.

"Governu estuda medida hirak ne'e, Konsellu Ministru aprova katak, ita sei hatuur medida nesesáriu bainhira krize ida mai", dehan nia. 

Entertantu, governante ne'e realsa, atu apoiu setór privadu sira durante situasaun emerjénsia no liuliu iha faze rekuperasaun bainhira surtu ruma iha rai-laran, bainhira rekupera oinsa governu atu bele apoiu sidadaun no empreza sira hodi bele rekupera fali ekonomia familiár para bele hetan nesesidade bazika iha familia no empreza sira bele moris fila-fali. 

Nune'e, sei kordena parte husi governu nian iha setór ekonómiku hotu hodi antesipa surtu ne'ebe iha no mós hanoin ona hodi tau iha planu ba rekoperasaun ne'ebé sei mosu. (*)