Ministru Agrikultura no Peska Joaquim José Gusmão hatete, governu Timor Leste seidauk iha kbiit atu kombate ka halo intervensaun ba atividade peska illegal tanba laiha fasilidade no ekipamentu adekuadu.

Daudauk ne’e, nia dehan, MAP serbisu hamutuk ho autoridade maritima hodi haree politika kombate peska illegal.

"Esforsu ne'ebé agora Ministériu Agrikultura no Peska halo ona mak ita mós iha peskador kostal sira, entaun ita husu par sira fó relatoriu kona-ba ro ne'ebé la identifikadu maibé halo operasaun peska ilegal iha tasi laran," dehan Joaquim ba jornalista sira iha edifisiu Ministeriu Finansas, Aitarak-Laran, Segunda (13/01).

Aleinde ne’e, nia dehan, MAP mós halo esforsu balun hanesan relatoriu dei't, maibé seidauk iha asaun atu kombate ka halo intervensaun ba atividade peska ilegal.

Tanba, nia hatutan, atu kombate peska illegal presiza iha ro rasik hodi kontrola masimu.

“Agora ita laiha ro patrulla, ro ne'ebé ita-nia Komponente Maritima no Naval iha la konsege halo fiskalizasaun ba tasi mane, akontesimentu peska ilegal barak liu iha Kosta Sul, Tasi Mane," nia esplika.

Ministru ne’e dehan, maske TL serbisu hamutuk ona ho Indonezia no Australia hodi halo patrulamentu ho aviaun iha tasi laran no konsege hetan duni dadus balun, maibé labele halo intervensaun tanba TL laiha ro patrullamentu.

"Ita iha inisiativa maibé haree kapasidade orsamental la to'o, entaun ita mós komprende ita-nia governu, neduni hakbiit aan buka no hakbesik fali ba parseiru sira karik bele sira mós ajuda ita iha parte ne'e," Joaquim hatete.