“Ohin loron, iha inisiativa ida husi VIII Governu Konstitusionál atraves SEFOPE atu komemora loron 30 Agustu hodi halo inspesaun ba ajénsia no kompañia ne’ebé maka hala’o nafatin aktividades ekonomia iha loron feriadu nasionál ne'e,” informa Julião iha Timor Plaza. 

Nia dehan, Konstituisaun RDTL preve katak iha loron 30 Agustu hanesan ferias nasionál ba sidadadun timoroan hotu, ne’ebé komemora loron importante Timor-Leste deside ninia destinu hodi sai pais indepedente.

Hatán kona-ba diretu traballadór atu servisu, SEFOPE hateten, direitu ema ida-idak nian atu servisu. “Maibe husu mós ba empregadór tenke respeitu traballadór sira nia direitu double pay. Tanba iha Lei Kódigu Laboral Nu.: 4/2012 preve klaru kona-ba direitu no dever traballadór no mós empregadór nian,” Julião afirma.

Realidade hatudu, durante la'o inspesaun iha terenu, loja barak maka kumpri hodi la halo atividade negósiu iha loron feriadu Nasionál 30 Agusto. Maski loja balun loke, maibé kompañia sira tenki selu traballadór sira-nia double pay. 

“Ba kompañia sira ne'ebé viola Lei Kódigu Laboral hodi la fó double pay ba ninia traballadór, sei simu sansaun tuir Lei haruka,” Julião afirma.

Durante loron ida tomak, SEFOPE nia ninia ekipa vizita loja hanesan Dilimart, Timor Plaza, W Four no loja sira seluk ne’ebé loke iha loron feriadu nasionál.