Tempotimor (Dili) – Primeiru Ministru Taur Matan Ruak afirma, Membru Governu (MG) inkompletu, la impede prosesu dezenvolvimentu ekonomia iha rai-laran.
Deklarasaun Xefi Governu ne'e, hanesan hafera opiniaun deputadu balu husi bankada AMP iha Parlamentu Nasionál (PN), ne'ebé durante ne'e kestiona katak Membru Governu (MG) inkompletu, halo impedementu ba prosesu dezenvolvimentu.
"Maski iha obstáklu barak, ne’ebé governu hasoru no difikuldade sira ne’ebé mosu tanba formasaun governu nian seidauk kompleta. Kuadru ida ne’e, la impede rekoperasaun graduál husi ita-nia ekonomia atu to’o ba nivel kresimentu, ne’ebé rejista ona to’o tinan 2016," dehan Primeiru Ministru Taur Matan Ruak iha ninia deskursu, bainhira aprezenta OJE 2020 iha Parlamentu Nasionál, Segunda (02/12/19).
Taur afirma, durante tinan 2019, ekonomia hatudu ona sinál rekoperasaun no aselerasaun, ne’ebé bele haree momoos.
“Krezimentu ne’ebé forte husi produtu internu brutu, la’ós-Petrolíferu, ne’ebé daudaun ne’e kalkula ba %5,1. Fó mai ita konfiansa no espetativa ne’ebé boot atu bele alkansa iha tinan 2020. Kresimentu ekonómiku ida hamutuk %7,2 atu kumpri hotu kompromisu ne’ebé governu asume ona ba povu no ba Parlamentu Nasionál, liuhusi ninia programa,” Taur esplika.
Iha parte seluk, tuir PM Taur relata, estabilidade polítika no sosiál ne’ebé governu promove ona, to’o oras ne’e, dudu ona kresimentu atividade husi ekonomia nasionál, no sei permite, iha futuru, hadi’a ba beibeik kondisaun moris ita-nia povu nian, ne’ebé hatudu ona iha retornu ba konsumu família, ne’ebé tenke rejista kresimentu ida besik %3 iha tinan 2020, hodi kontribui ba redusaun ida ne’ebé signifikativu ba taxa pobreza, tinan ne’e, ba %31,8, ne’ebé reprezenta menus pontu persentuál sanulu, bainhira kompara ho tinan fiskál 2014.
"Rezultadu sira-ne’ebé enkoraja ita ne’e, la’ós de’it méritu ka konkista governu nian de’it, maibé ema hotu nian ne'ebé iha tinan ida ho balu nia laran ne’e, sei kontribui ba pás no estabilidade polítika no sosiál iha ita-nia país,” nia tenik.
