Tempotimor (Dili) – Impase Polítika iha rai-laran, a finál da'et hotu ba problema eletrisidade mate-lakan, ne'ebé rezulta halo populasaun barak ninia sasán eletrisidade sira, aat no kema saugate de'it.

"Ita iha tinan rua liubá, laiha osan atu halo manutensaun no atu hola ekipamentus. Armajen mamuk. Nia impaktu mak ahi mate-lakan," dehan Diretora Jerál Eletrisidade, Arlinda M.R.F.F. Miranda ba tempotimor.com no Jornál Independente iha ninia knaar fatin, Kaikoli, Dili, Kuarta (27/11/19).

Nia relata, kuandu eletrisidade mate ona mak foin ba halo atendementu. Kuandu lakan hela, husik hela de'it. Tanba laiha ekipamentus rezerva atu halo atendementu ho di'ak.

Arlinda afirma, kauza seluk ne'ebé halo ahi mate-lakan mak sasán ne'ebé avaria no distribuisaun uza sistema manual.

“Entaun, bainhira avaria iha parte ruma, parte téknika sira sei ba buka tuir mak foin halo atendementu,” nia esplika.

Sasán Aat

Alende ne'e, ba tempotimor.com populasaun iha Becora, J. Rigoberto (52) kestiona kona-ba ninia sasán eletrisidade hanesan jeladeira ka kulkas no kipas angin nomos sasán sira seluk, ne'ebé estraga, rezultadu husi ahi mate-lakan.

“Ahi mate-lakan hela de'it hanesan ne'e, halo ami populasaun nia sasán sira estraga hotu. Ha'u mós lahatene, sei ha'u lori sasán hirak ne'e ba reklama iha EDTL, kariik bele iha hanesan kompesasaun ka lae?” José hatete.   

Nia esplika, iha parte seluk, kondisaun ahi mate-lakan hela de'it hanesan ne'e, halo komunidade sira sente la hakmatek.

“Kalan-kalan ita tenke hadeer. Tanba, bainhira ahi mate-lakan hela de'it, provoka na’ok-teen sira bele tama uma na’ok ita-nia sasán balun,” nia hatete.