Tuir komunidade husi Suku Com, Olegario da Costa katak, animal hanesan karau, bibi, kuda inklui ikan sira ne’ebé komunidade sira haki’ak iha kolam susar tebes ba bee tanba kauza husi mudansa klimátika.

“Bee matan sira boot mos menus, entaun afeita ba animal sira baibain uza bee matan sira ne’e halai hotu mai iha bee matan ida dadaun ami uza ne’e, ami iha bee mata barak, balun uza balun abandona i balun ema la uza, maibé ida ami uza ne’e bee matan ida boot ne’e, mais bee matan ki’ik balun ne’ebé dala barak iha tinan barak nia laran la maran agora mos nia maran”, dehan nia iha Com, segunda (18/11).

Nia define, bee matan ne’ebé maran mak iha área atiku, kamanu i ida iha parte ira masi nian mós maran, no bee matan boot mós menus hotu ona, entaun afeita ba iha animal sira ne’ebé baibain konsumu.

“Ita haree ba hirak ne’e mak sai impaktu no iha duut mós mate hotu, ita haree ba ai-horis balun mós mate haree ba maran liu tanba ita haree rai manas los”, nia dehan

Nune’e kompara ba tinan kotuk tinan ida agora manas liu, tanba iha bee kolam balun mós manas los, entaun ikan sira labele augenta atu moris to’o balun mate, ne’e susar tebes ba komunidade sira atu haki’ak ikan iha tempu ida ne’e.

”Ita kompara ba tina hirak liu ba ne’e, ha’u haree tinan ida ne’e aat liu, tanba haree ba rai manas los, depois bee matan balun menus i balun maran liu barak maran”, nia hatete

Bee matan iha parte Com barak, maibé balun uza no balun la uza, tanba ne’e dadaun bee ne’ebé komunidade sira uza hela mak bee matan ida boot, tanba iha bee matan ki’ik barak mak maran ona.

Situasaun ne’e, Xefe Suku Com, Sergio José Cristovão mós akresenta katak, iha tempu bailoron naruk iha animal barak mak susar ba bee, tanba bee matan balun maran ona iha de’it balun, maibé ne’e presiza halo jestaun di’ak se lae susar.

“Diáriamente bailoron naruk susar, komunidade balun compline, maibé ha’u orienta ona ba xefe aldeia sira par hato’o komunidade sira nia problema mai atu ita rezolve tuir ita nia kapasidade no kbiit”, nia afirma

Nia dehan, ba problema bee mos ne’e, bainhira iha parte suku nian rezolve labele, entaun sei hato’o ba iha parte governu atu bele solusiona.

Suku Com kompostu husi Aldeia 6 mak hanesan, Vailovaia, Muapusso, Lohomato, Etepite, Epelipe no Ira-Ono, ne’ebé iha ninia uma ka’in 883 ho abitante 3.871 kompostu husi mane na’in 1.936 no feto 1.906.

Tuir observasaun www.tempotimor.com iha terrenu nota katak, iha área protejida parke nasionál nino koni santana, munisípiu lutém komunidade barak mak halerik hela bee mos no animal balun mos susar atu hetan bee. (*)