Tuir informasaun ne’ebé www.tempotimor.com asesu iha pájina ofisiál governu, kinta (11/05), Ministru Prezidénsia Konsellu Ministru, Fidelis Leite Magalhães hatete, Konsellu Ministrus autoriza ona, tuir projetu sira ne’ebé aprezenta husi Ministru Obras Públikas (MOP).

Desizaun Konsellu Ministru autoriza despeza sira hodi hahú prosesu aprovizionamentu no formalizasaun tuir kontratu públiku ezekusaun obra nian ba konstrusaun estrada Soibada – Soibada Vila (9.791 kms), iha Munisípiu Manatutu, ho valór estimadu dolar amerikanu millaun 10,1.

Nomós despeza ba konstrusaun estrada entre Entronkamentu (dalan-sorun) husi Laklubar  - Laklubar, iha Munisípiu Manatutu, ho estensaun 10.360 kms no ho nia valor estimadu dolar amerikanu millaun 5,8.

Iha despeza ne’e hodi hahú prosesu aprovizionamentu no formalizasaun tuir kontratu públiku ezekusaun obra nian ba konstrusaun sistema abastesimentu bee iha sidade Baukau, ho valór estimandu dolar amerikanu millaun 27,1. (*)