Sekretáriu administrasaun Munisípiu Baukau, Simão dos Santos Marques Pinheiro, esplika, programa merkadu rejionál ne'ebé atu estabelese iha Baukau, Autoridade Munisípal halo preparasaun hahú kedas iha tinan 2018-2022, hanesan halo aterusaun ba rai, harii moru protesaun inklui harii uma ba vendedores.
"Fatin ne'ebé atu utiliza ba merkadu rejionál ne'e hamutuk hektar 8, sorin balun ne'ebé agora utiliza ona ho orsamentu ne'ebé iha, no espasu luan sei hela, para konstrui fali planu ne'ebé agora MTCI halo dadauk", dehan nia iha vila nova, sesta (10/03).
Tanba ne'e, dadaun autoridade Munisípal hahú levanta dadus ba vendedóres no identifikasaun tipu negósiu nian, nune'e konstrusaun merkadu rejionál remata, bele kolloka negósiante sira tuir fatin, bazeia ba tipu negósiu.
Negósiate ne'ebé Autoridade Munisípal halo identifikasaun provizóriu hamutuk 989, ho tipu negósiu 29, kompostu husi fatin 3, hanesan, merkadu vila nova, vila antiga inklui beskem.
"Atravesa tipu negósiu sira ne'e ita fahe ba bloku sira para lalika fa'an hamutuk, hanesan sasan nesesidade bázika, roupa, atu ita orienta ema ne'ebé tama lalika preukupa", nia akresenta
Alende merkadu rejionál tuir planu sei konstrui mós terminál rejionál, iha Tuanau, tanba iha ona konkordasia entre autoridade Munisípal ho parte Transporte Terrestre Nasionál ne'ebé sei konstrui iha tinan 2023.
Entretantu Munisípiu Baukau nia área luan 1,504.2 km2 kompostu husi Postu Administrativu-6, Suku-59 iha OPS-59, no totál populasaun hamutuk 126,562, husi populasaun hirak ne’e, maioria ko'alia lian Tetun, Makasa'e, Waimu’a, Midiki, Kairui inklui Naueti. (*)