Komunidade husi Suku Samalari, Canizio Nazario Peidade Fraga, esplika, udan boot akontese foin lalais, liu-liu mota husi Postu Administrativu Ossu, Munisípiu Vikeke no Postu Kelikai inklui Postu Venilale, ho volúme boot konsentra iha mota Salamari, kauza sobu rai hodi fó impaktu ba komunidade balun nia hela fatin.
"Uluk mota ne'e tuun la besik mai uma, maibé husi tinan 2021, 2022 to'o agora, tempu udan makas mota tuun boot, nia sobu rai ne'e to'o agora besik mai tiha uma, ne'e fó ona ameasa mai ami nia uma", nia haktuir iha Suku Salamari, kuarta (08/03).
Nune’e husu ba Governu liu-liu Ministériu Obras Públikas (MOP) atu halo normalizasaun ba mota refere, tanba hahú ona fó risku ba komunidade nia hela fatin.
Xefe Suku Samalari, Rui Sertório Magno Siquerra, afirma, mota boot tuun hodi sobu rai iha área Laualia'a, Suku Samalari fó impaktu ba komunidade nia hela fatin, tanba mota hahú fó ameasa ba uma komunidade hamutuk-183.
"Husi uma 183 ne'ebé ha'u temi ita sura ba pursentu karik, uma pursentu-7 hanesan ne'e risku liu ona atu mota sobu, sira seluk sei do'ok oituan", nia informa
Enkuantu distánsia mota ho uma hela fatin komunidade nian antes ne'e, kuaze do'ok malu metru-20, maibé mota sobu rai ne'ebé satan netik uma komunidade, kauze hela de'it ona metru-3.
Nune'e iha fulan hirak liuba nia parte submete kedas proposta ba Instituisaun Jestaun Ekipamentus Institutu Públiku (IJE.IP) hodi halo manutensaun ba mota refere.
"Entaun bazeia ba proposta ne'ebé ha'u haruka ba, Prezidente IJE.IP horseik to'o kedas fatin haree ho matan atu halo salva guarda, orsida ekimantus pezadu husi IJE.IP atu normaliza mota atu bee suli tuir fali nia dalan antigu", nia akresenta
Tuir planu normalizasaun ne'ebé atu halo, ke'e fali bee dalan iha mota laran, husi monumentu David Alex nia subar fatin to'o kanál irrigasaun sobabere nian, ne'ebé distánsia kilometru-3 nia luan metru-6.
Entretantu Suku Samalari kompostu husi Aldeia 4, hanesan Aldeia Samalari, Sorulai, Festau inklui Ossoluga ho totál populasaun 3.187 husi Xefe familia 681. (*)
