Tempotimor (Ermera)-Sekretáriu Estadu Kooperativa (SEKOOP), Elizário Ferreira hatete, kooperativa Timor-Leste adere ba organizasaun ida naran ACO (ASEAN Coopartive Organization) dezde tinan 2012.
"Iha tinan 2012 ita adere mós ba organizasaun ida naran ACO (ASEAN Coopartive Organization) ne'ebé mak agora dadaun Timor hadau atu tama ne'e naran ASEAN Timor-Leste sai membru dezde tinan 2012, la'ós SEKOOP mak lori ba, maibé movimentu Kooperativa Kréditu Uniaun sira mak lori ba", dehan nia iha Suku Deleco, Postu Administrativu Railaku, Munisípiu Ermera, segunda (20/02).
Kooperativa Timor-Leste mós adere ba International Alliance Coopartive (IAC) iha tinan 2013, nune'e mós iha tinan 2016 mós adere ba WOCU (World Counsil Of Credito Union), ne'ebé dadaun nia baze iha Amérika Winstong.
Kooperativa iha Timor-Leste mós sai fundadór ba Oceania Confederation Credito Union Link iha tinan 2010.
Hafoin ne'e, iha tinan 2021 kooperativa sira iha Timor-Leste reprezentante ema ida hodi simu rezolusaun formál husi nasaun unidas.
Husi Dezenvolvimentu kooperativa iha Timor-Leste ne'ebé la'o di'ak, mundu rekoñese katak nasaun Timor-Leste mós iha Kooperativa Kréditu Uniaun inklui mós Kooperativa Produsaun no Multisetorál sira.
Dadaun ne'e iha Timor-Leste, sidadaun sira ne'ebé mak envolve iha vida Kooperativa hamutuk 118.000.
Alende ne’e, SEKOOP ho komitiva sai sasin ba serimónia toma posse ba Dirijente Kooperativa Multisetorál Halibur Libudu Darema Darema, Mary MacKillop Edmund Rice iha Suku Deleco, Postu Administrativu Railaku Munisípiu Ermera.
Sekretáriu Estadu Kooperativa husu ba dirijente sira servisu maka'as atu ema hotu bele envolve iha vida Kooperativa.
"Kona-ba imi nia uma, pelu menus tenke bolu ema barak atu sai membru ba Kooperativa, kuandu minimu to'o ona 250 imi halo proposta ha'u aprova osan ba imi nia sede, tanba ha'u halo uma ida labele halo ba animal sira de'it mak hela, tanba ne'e imi tenke servisu maka'as atu buka tan membru", nia husu
Nune’e Prezidente Eleito Kooperativa Multisetorál HALIDAME, Cecilia Carvalho mós garante atu akumula ema sira iha Suku Deleco laran inklui mós suku seluk ne'ebé hakarak envolve iha vida kooperativa.
"Husi suku Deleco populasaun menus oituan, nune'e ami mós bele Liga ba ami nia suku Viziñu bele iha liña kordenasaun halo enkontru atu fahe informasaun ba sira bele mai hamutuk atu bele aumenta ami nia membru ne'ebé ita nia Sekretáriu Estadu Kooperativa temi", nia hateten.
Kooperativa Multisetorál HALIDAME ne'e hetan suporta maka'as husi Organizasaun Mary MacKillop today, nune'e fasilita formasaun ba Membru Kooperativa sira.
Atividade diariu husi CM HALIDAME mak hanesan hakiak baunila, suku hena, homan bote, biti no seluk, inklui mós hakiak animal sira.
Totál dirijente sira ne'ebé simu posse hamutuk 15 no serimónia ne’e partisipa husi Sekretáriu Estadu Kooperativa (SEKOOP), Elizário Ferreira ho nia komitiva Country Diretór Mary MacKillop Today, Komandante PNTL eskuadra Postu Administrativu Railaku, autoridade lokál no membru Kooperativa HALIDAME. (*)
