Nune’e Ministru Obras Públikas (MOP), Abel Pires husu ba komunidade afeitadu sira labele impede projetu refere.
Tuir informasaun ne'ebé www.tempotimor.com asesu sesta (17/02) katak, MOP halo ona kontaktu ho kompaña 4, kontratór ida no kosultór ida ne’ebé halo konstrusaun ba estrada Laga-Baguia no kontratór ida no konsultór ida ne’ebé halo konstrusaun ba estrada Uaiaka-Kelikai-Ossu.
“Laga-Baguia mós hanesan, iha sesta (10/02) liubá ha’u ko’alia ona ho kompañia 4, rua kontratór no rua ne’ebé halo supervizaun, kompletu hotu ona, agora prosesu ba hotu tereñu ona para halo servisu ne’ebé laiha problema, laiha tan prosesu administrativu ruma atu impede buat ida ne’e, laiha, agora ne’e hein ezekuta de’it ona”, dehan Minístru Abel Pires.
Husu ba autoridade lokál no komunidade ne’ebé hetan afeitadu husi projetu ne’e atu koopera no apoiu iha prosesu implementasaun.
“Finaliza ne’e ita la hatene, ha’u-nia inan-aman sira iha ne’eba hein 22 anos, agora pasiensia hein lai semana ida rua ba para ita rezolve, ita hahú kedas agora, orsamentu iha, vistu iha, laiha tan buat ruma atu bele impede, hein katak xefe suku ho populasaun sira labele impede, se impede ne’e ami sei ba direitamente para resolve, tanba ida ne’eba ne’e projetu importante", nia esklarese.
Kona-ba indiminzasaun ba komunidade afeitadu, antes ne’e informa ona katak, orsamentu transefere ona ba Banku Nasionnál Komérsiu Timor-Leste (BNCTL, sígla Portugués) no hein halo pagamentu ba komunidade afeitadu sira, tanba ne’e, husu nafatin komunidade afeitadu atu servisu ho kompañia kontratór ne’ebé daudauk hahú konstrusaun tereñu, tanba projetu ne’e importante tebes.
Reabilitasaun ba estrada Laga-Baguia ezekuta husi kompañia internasionál Norinco International Cooperation Lda, ho orsamentu hamutuk millaun US$21-resin ($21.695.194.98) duurante tinan rua nia-laran. Projetu ne’e hetan supervizaun husi konsultór PT. Inacon Luhur Pertiwi, JV Kai Watu Kmanek Consultant, Unip. Lda, no PT Sinotech Engineering Indonesia.
Ba projetu estrada Uaiaka-Kelikai to’o parte balun postu administrativu Ossu nian konstrui husi kompañia Internasionál Chongqing International Construction Corporation (CICO), ho montante orsamentu hamutuk millaun $16 ($16.547,661,76) ho durasaun tinan ida fulan 6. (*)