Diretór Diresaun Teras Propriedade (DTP) Munisípiu Baukau, Raimundo de Jesus Barros, esplika, durante tinan 2022 kongese hatama osan ba kofre estadu hamutuk rihun US$27.567, no inisiu tinan 2023 fulan-janeiru, ho montante rihun US$5.28,00 enkuantu osan hirak ne'e DTP Baukau rekolla, husi komunidade ne'ebé okupa uma no rai estadu.
"Diresaun Teras Propriedade Munisípiu Baukau hetan reseitas ne'ebé hatama ba kofre estadu hamutuk rihun US$30-resin", nia relata iha kna'ar fatin vila nova Baukau, Tersa (14/02).
Husi reseitas ne'ebé DTP rekolla, tanba koridór kontratu arendamentu nian, ne'ebé aplika ba komunidade hela iha uma no rai estadu, husi Postu Baguia na'in-ida, Laga na'in-2, inklui Postu Baukau vila na'in-166.
Enkuantu Postu Administrativu Kilikai, Venilale no Vemase tuir planu, sei aplika kontratu arendamentu ba komunidade sira, iha tinan ne'e.
"Ita tenke kobre hotu rai no uma estadu ne'ebé komunidade okupa, aplika kontratu arendendamentu para sira selu", nia akresenta
Tanba tuir lei Nu.01/2013 katak, rai no uma ne'ebé pertense ba estadu mak hetan okupa husi komunidade, tenke halo kontratu arendamentu selu fulan-fulan tuir medida rai no uma ne'ebé iha.
"Kada uma ida depende ba medida rai nia, tanba ita sukat hatene tiha nia medida mak halo avalisaun determina nia valór osan, selu hahú husi US$5.00 ba leten, kios sira ita aplika US$25.00 ba leten", nia informa
Uma no rai estadu ne'ebé dadaun komunidade sira okupa kada fulan selu arendamentu ba estadu, la signifika komunidade atu sai na'in loloos ba rai no uma, maibé wainhira estadu presiza atu uza, iha direitu atu foti no la devolve osan ne'ebé antes utilizadór rai no uma estadu sira selu kada fulan.
"Hanesan ita kost ema nia uma, to'o tempu uma na'in dehan ita sai, ita tenke sai, la'os kada fulan selu ne'ebé atu sai fali uma na'in", nia subliña
Husu komunidade okupa uma no rai estadu ne'ebé dadaun seidauk halo arendamentu ba estadu, tenke koopera ho servisu kadastrais Munisípal wainhira to'o fatin halo levantamentu hodi selu taxa ba kofre estadu.
Entretantu prosesu arendamentu selu taxa ba estadu, komunidade okupante tenke liuhusi edifísiu DTP Munisípal foti resibu, hafoin lori ba Banku hodi selu. (*)
