Diretór Diresaun Servisu MOP Baukau, Pedro Alexandre Guterres Perreira, esplika, iha tinan 2023, diresaun servisu Munisípal Baukau, submete lista estrada rural ba nasionál hamutuk 11, no hetan ona verifikasaun husi Ajénsia Nasionál Dezenvovlimentu (ADN).
Enkuantu projeitu pakote 11 ne’e, iha Postu Administrativu Baukau Vila, husi Suku Samalari-Buibau no Belavista hamutuk kilometru-10.5, ne'ebé fahe ba pakote-6, kada pakote ho kilometru-2.
Postu Laga, Suku Sagadati hamutuk kilometru-8.5, ne'ebé fahe ba pakote-4, tanba sei halo reabilitasaun husi Aebuti ba Sirabu'u no husi Sagadate ba Beliuali.
Maibé iha Postu Laga, ligasaun husi estrada nasionál área Dailari ba Samaguia, ne'ebé ho projeitu kontinuasaun husi 2.3, ba 4.6 kilometru.
"Ne'e reabilitasaun ba klase D hotu, iha parte balun ne'ebé mak ejizensia tebes klase E mós ita tama", dehan nia iha kna'ar fatin vila nova Baukau, tersa (07/02).
Enkauntu husi prosesu verifikasaun ba dokumentus estrada rural pakote 11 iha ADN, sei entrega hikas ba Ministériu Obras Públika hodi loke ba prosesu aprovizionamentu.
"Ita bele hateten, talvez fulan maiu sira ne'e ita implementa ona", nia akresenta
Projeitu reabilitasaun hamutuk pakote 11 ne'e, nia istimasaun orsamentu hamutuk tokon US$5-resin.
Entretantu identifikasaun ba estrada rural sira iha Baukau, ne’ebé hahú iha tinan 2016-2020 konsege hetan dadus verifikasaun hamutuk kilometru-447, no konsege rezolve ona pursentu-50, tanba hela kilometru-200 resin mak seidauk halo manutensaun iha nivél Munisípiu. (*)
