Ministériu Finansas to’o iha inísiu fulan-fevereiru tinan 2023, halo ona levantamentu osan husi Fundu Minarai ho montante tokon US$300 husi totál US$1,3 bilhões ne’ebé mak Parlamentu Nasionál aprova ona liuhusi Lei Orsamentu Jerál Estadu 2023 no promulgadu husi Prezidente Repúblika, José Ramos Horta, iha loron 21 fulan-dezembru tinan 2022.
Tuir informasaun ne'ebé www.tempotimor.com asesu iha pájina ofisiál Ministériu Finansas (07/02) katak, to'o iha loron 6 fulan-fevereiru, ezekusaun reál OJE 2023 ba Administrasaun Sentrál em termos nominál atinji ona tokon US$38,8 husi totál orsamentu US$2,1 bilhões.
Rekorda iha tinan kotuk, Oitavu Governu Konstitusionál lideradu husi Primeiru Ministru, Taur Matan Ruak konsege ezekuta US$1,743 bilhões husi totál orsamentu US$2,2 bilhões.
Valór nominál US$1,743 bilhões ne’e mak aas liu iha istória Timor-Leste desde país ne’e restaura ninia Independénsia no konsege ultrapassa ezekusaun reál iha tinan 2016 iha ne’ebé Governu konsege ezekuta US$1,630 bilhões.
Tinan kotuk, Governu halo levantamentu osan husi Fundu Minarai hamutuk US$1,4 bilhões ka 90% husi totál US$1,55 bilhões ne’ebé Parlamentu Nasionál aprova liuhusi Lei OJE Retifikativu 2022.
Montante US$1,55 bilhões ne’e esklui ona Fundu Kombatetentes Libertasaun Nasionál US$1 bilhão ne’ebé tinan kotuk Tribunál Rekursus deklara Inkonstitusionál no automatikamente eliminadu husi kontas públikas. (*)