Enkuantu estrada públiku husi diresaun rotunda Nagardjo to'o rotunda vila nova Baukau, ne'ebé ho distánsia kilometru-5 kondisaun aat, tanba kondisaun estrada ku'ak ne'ebé tempu udan been, kauza udan been nalihun, hodi difikulta ba movimentu ema ho transporte.

Nune'e mós, vendedóres sira iha merkadu vila antiga no vila nova, ne'ebé kontinua harii baraka fa’an sasan iha dalan ninin estrada públiku nian, maibé laiha atensaun husi parte relevante, hodi muda vendedór sira tuir kritériu merkadu seguru nian.

"Dehan Baukau seguru merkadu seguru, ita haree merkadu ne'e, Baukau segundu sidade, ita haree estrada iha Nagardjo nian, Baukau seguru ga la seguru, aat loos, rungu-ranga boot", dehan nia wainhira partisipa iha reuniaun programa merkadu seguru anivél Munisípiu iha salaun apuramentu Baukau, tersa (07/02).

Atu atinji programa Baukau seguru no merkadu seguru, presiza hadi'a infraestrutura estrada públiku sira iha sidade laran ne'ebé kondisaun aat, no orienta vendedóres sira atu labele okupa liu iha estrada ninin, nune'e labele fó impaktu ba movimentu ema ho transporte, alende mós ema estranjeiru halo vizita to'o nivel Munisípiu, bele garante sidade nia seguru.

"Estrada de'it hanesan ne'e, wainhira ema bainaka estranjeiru ruma mai, ita hakerek Baukau seguru merkadu seguru, maibé realidade ne'e la-seguru, aat liu", nia akresenta

Hatan ba kestaun ne'e, Sekretáriu Autoridade Munisípiu Baukau,  Simão Marques Pioneiro, rekoñese, realidade kondisaun refere akontese duni iha Munisípiu, maibé nu’udar autoridade sei responde fazeadamente.

"Liu-liu estrada protókolu sira ne'e hela responsabilidade Governu sentral nian, Autoridade Munisípal laiha posibilidade atu halo, mais ita nafatin husu ba sira nasionál", nia argumenta

Entretantu Munisípiu Baukau iha área luan 1,504.2 km2 kompostu husi Postu Administrativu-6, Suku-59 iha OPS-59, no totál populasaun hamutuk 126,562, husi populasaun hirak ne’e, maioria ko'alia lian Tetun, Makasa'e, Waimu’a, Midiki, Kairui inklui Naueti. (*)