Tuir Diretór DNEE, Filomeno Soares hatete, serimónia asina deklarasaun hanesan konkordasia entre família traballador no Governu liu-husi SEFOPE.
"Ohin halo serimonia ida ne'e atu asina deklarasaun ida katak, família prontu atu husik nia fen, la’en ka nia oan atu ba servisu iha Australia la’os governu maka obriga, nune’e mosu problema ruma parte rua iha hotu responsabilidade hodi rezolve", dehan nia iha Salaun DNEE Bekora, (06/02).
Apela ba joven Timoroan na’in 31 ne’ebé hetan ona oportunidade, ba servisu atu hatudu komportamentu ne’ebé di’ak labele halai ses husi sistema, tanbá imi maka sai save atu empregadór sira bele emprega tán joven rihun 15 ne’ebé he’in hela iha sistema work ready pool SEFOPE nian.
Maske ba servisu iha ema nia rain la’os permanente, maibé atu aproveita hetan esperensia no menan ema nia osan, hodi fila mai bele hadi’a ekomía família no kresimentu ekonomia nasaun Timor-Leste.
Husu mós ba família traballadór sira atu labele halo problema hodi prezudika sira nia servisu, no karik sira haruka osan mai atu utiliza hó didi’ak, tanbá antes sira hetan osan sira hasoru servisu ne’ebé todan tebes. (*)
