Tempotimor (Dili)-Governu Timor-Leste liuhusi TIMOR GAP, Woodside, no Osaka Gas halo ona negosiasaun hodi hili konsultan terseira parte ne’eb’e espesialista no kredivel atu hahú halo estudu evaluasaun ba opsoins konseitu dezenvolvimentu kampu Greater Sunrise (GSR).

Tuir informasaun ne'ebé www.tempotimor.com asesu iha pájina Facebook Primeiru Ministru, Taur Matan Ruak (05/02), katak, liu husi TIMOR GAP nia ekipa negosiasaun ba Greater Sunrise konsege ultrapassa desafiu no obstákulu iha negosiasoins, nune'e konsorsiu GSR ou Sunrise Join Ventures (SJV) ne’ebé kompostu husi TIMOR GAP, Woodside, no Osaka Gas konkorda atu hili konsultan terseira parte ne’ebé espesialista no kredivel atu hahú halo estudu evaluasaun ba opsoins konseitu dezenvolvimentu kampu GSR.

Nune'e, Sunrise Join Ventures (SJV) sei determina konseitu dezenvolvimentu ba kampu mina no gas GSR ho foku prinsipal ba dada kadoras mai RDTL no dezenvolvimentu LNG iha RDTL, resultadu estudu avaliasaun sei kompleta menus husi fulan 6 nia laran.

Fo hanoin fali, depois deskobrimentu komersiál kampu mina no gas Greater Sunrise (GSR) iha tinan 1974, no tinan 20-resin kampu GSR ne’ebé lokaliza iha área konjunta entre RDTL- Australia, la iha certeza ba opsoins atu dezenvolve kampu mina no gas GSR, tanba diferensia hanoin entre governu RDTL no Australia nomos entre Operador Woodside no Konsorsio Sunrise nian relasiona ho konseitu dezemvolvimentu Kampu no fatin atu dada kadoras ba Gas sunrise nian. (*)