Diretór Jerál Planeiamentu ba Orsamentu husi MF, Salomão Iaquim Menezes, informa, ezekusaun OJE 2023 nian prezisa fó koñesementu ba implementadór sira iha nivél Munisípiu, nune'e bele intende kona-bá lei enkaundramentu orsamentais númeru 02/2022, no pontus importante husi dekretu lei númeru 18 kona-bá programa orsamentais no dekretu lei númeru 19 klasifikadór ekonómiku.
"Ida ne'e mak ami la mai informa ba implementadór sira mak tempu ruma sira bele ezekuta orsamentu ne'e sala, tanba ne'e ami mai hodi fasilita sira hodi bele implementa prosesu ezekuta orsamentu nian", dehan nia iha salaun apuramentu Baukau, Kuarta (01/02).
Tanba implementasaun Orsamentu Jerál Estadu (OJE) ne'ebé akontese iha 2023 ho kódigu barak, ne'ebé difirente ho tinan 2022 ba kotuk.
Lei kona-bá jestaun orsamentu finanseiru ekonómika anterior iha klasifikasaun katégoria 5, maibé iha tinan 2023 nakfila tiha sai katégoria 19, ne'ebé prezisa hatuur tuir nia funsaun ida-idak, tanba katégoria 5 antes fó difikulta ba administradór hodi ezekuta orsamentu jerál.
Nune'e ba kategória 19, sei ezekuta Orsamentu Jerál Estadu tuir funsaun ida-idak no fasilita servisu administrasaun nian.
"Ezemplu, antes ne'e kontratadu husi asesór nasionál ba funsionáriu kazuais sira uluk ita selu husi bens servisu, agora tenke selu husi pagamentu pesoal, osan ne'ebé ita selu ona ba nia, la fó fila, entaun ita hatuur ida ne'e ho loloos, nune'e mós viajem ba estranjeiru uluk ita selu husi bens servisus, maibé agora ita hatuur ona ba despensa pesoal, tanba perdiem ne'ebé ita hasai ba duni ema ne'e, entaun ita konsidera ida ne'e importante tenke hatuur tuir nia funsaun ida-idak", nia esplika
Administradór Munisípiu Vikeke, Januario Soares, konsidera, sosializasaun refere importanre, tanba bele intende lei enkuandramentu orsamentu nian hodi kompleta finanseira Munisípiu.
"Lei ne'e bele fasilita liután, tanba uluk ne'e rubriga sira ne'e labele muda, maibé lei ne'e fó espasu oituan karik nesesidade mak importante liu bele halo transfere entre kategória sira", nia hatete
Enkuantu sosializasaun refere realiza durante loron 3, ne'ebé partisipante hamutuk ema na'in-100 ne'ebé husi delegasaun Administradór Munisípiu Lautem no Manatutu, Administradór Munisípiu Vikeke ho nia ekipa, inklui Prezidente Autoridade Munisípiu Baukau ho Administradór na'in-6 no dirijente liña-ministeriais sira iha Baukau. (*)
