Tuir informasaun ne'ebé www.tempotimor.com asesu iha pajina ofisial AIFAESA, I.P iha Tersa-feira (31/01) katak, destroisaun ba produtu sira husi empreza 2, hanesan empreza Lusin halo destroisaun ba produtu la’os ai-han ho kuantidade hamutuk palet 60-resin, enkuantu empreza Seara mós koordena hodi junta prosesu destroisaun iha fatin hanesan hamutuk ho empreza Lisun, ba produtu na’an manu, ne’ebé AIFAESA asegura ho asaun autoselajen iha estabelesimentu Seara iha loron 30 fulan-dezembru tinan 2022 liu ba.
Distroisaun ne'e, AIFAESA liuhusi Diretór Departamentu Operasaun, Viriato Paulo, Xefe Seksaun ba Atividade Komersiu no Indústria, Filipe Gomes hamutuk ho inspetores, halo akompañamentu ba prosesu destroisaun ba produtu sira la’os ai-han ne'ebé liu ona prazu, hosi empreza LISUN, iha lixu fatin, Tibar.
Alende mós, iha loron 30 fulan-janeiru tinan 2023, ekipa operasional, lidera husi Xefe Brigada Komersiu no Indústria, Inspetór David Belarmino, hala'o inspesaun no fiskalizasaun ba estabelesimentu MLK STAR, Unipessoal, Lda. ne'ebé lokaliza iha Delta, konsege deteta aktu irregularidade ne'ebé komete husi empreza refere, tanba komersializa produtu ai-han expiradu, hanesan "Ultra Milk, Orange Water, Koepoe - Koepoe, no Daging sosis.
Nune'e inspetór sira halo aprensaun ba produtu hirak ne'e, no sei prosesu hasoru operadór ekonomíku refere. (*)