Print this page

Governu Hasai Kbi'it Laek Na'in-9 Husi Uma Baraka iha Triloka

By January 31, 2023 2093
Diretór Jerál Dezenvolvimentu Rurál, Rosito Guterres lori sai hela benefisiária Faustina da Costa husi uma antes ba Uma Naronam ba Povu iha Aldeia Lekiloiuatu, Suku Triloka, Postu Administrativu Baukau Vila, Munisípiu Baukau, tersa (31/01). Diretór Jerál Dezenvolvimentu Rurál, Rosito Guterres lori sai hela benefisiária Faustina da Costa husi uma antes ba Uma Naronam ba Povu iha Aldeia Lekiloiuatu, Suku Triloka, Postu Administrativu Baukau Vila, Munisípiu Baukau, tersa (31/01). Foto Tomas Freitas

Tempotimor (Baukau)-Governu liuhusi Ministéru Administrasaun Estatál (MAE) konsege hasai ona Xefe família kondisaun moris kbi'it laek ne’ebé durante hela de’it uma baraka iha Suku Triloka, Postu Administrativu Baukau Vila, Munisípiu Baukau.

Tanba, Governu oferese ona Uma Naroman ba Povu (UNP) faze daruak hamutuk 9, ne’ebé dignu ba sira hodi hela.

Tinan 2022, Governu liuhusi MAE implementa UNP iha Munisípiu Baukau hamutuk 553, ba Suku 59, ho nia alokasaun orsamentu tokon US$9.779.520 no osan ba operasional hamutuk US$ 359.718,00.

UNP ba faze daruak iha Baukau, hahú konstrui iha fulan-Augostu tinan 2022, maibé iha fulan-janeiru tinan 2023, ekipa delegasaun teritórial PNDS Baukau, konsege rejista UNP ne'ebé finaliza ona pursentu 100 hamutuk 9, maibé restu seluk sei iha faze konstrusaun, tanba kondisaun estrada kauza husi udan difikulta ba transporte atu lori material konstrusaun.

Tanba ne'e, iha loron 31 fulan-janeiru tinan 2023, oitavu Governu Konstituisionál liuhusi delegasaun MAE, Diretór Jerál Dezenvolvimentu Rurál, Rosito Guterres, akompaña husi Sekretária Ezekutiva ST-Programa Nasionál Dezenvolvimentu Suku (PNDS) Nasionál, Claudina Soares Pinto hamutuk ho Autoridade Munisípal, Autoridade Postu Baukau Vila no Autoridade Lokál Suku Triloka inagura ona UNP faze daruak hamutuk uma 9 iha Aldeia Lekiloiuatu, Suku Triloka, Postu Baukau Vila, Munisípiu Baukau.

"Inagura ida ne'e ita mai hasai ita nia inan ida husi baraka ba iha uma di'ak, ne'e faze daruak ita bolu Uma Naroman ba Povu regular 2022, ne'ebé uma 9-12 kada Suku, iha Baukau ita ohin loke ona sesaun ofisialmente inagurasaun", dehan Diretór Jerál, Rosito Guterres iha Aldeia Lekiloiuatu, Suku Triloka hafoin halo inagurasaun, tersa (31/01).

Maske Oitavu Governu Konstituisionál iha nia mandatu hasoru dezafiu oioin, maibé nafatin ho komprimitidu, tanba bazeia ba Konstituisaun Repúblika Demokratika Timor-Leste (K-RDTL), katak, povu mak sai sentru ba dezenvolvimentu, tenke moris iha uma kondisaun dignu no seguru.

Tanba iha kuarta alterasaun husi dekretu lei númeru 94 PNDS katak, povu iha kbi'it atu moris no rejiste, maibé prezisa Governu fó naroman ba povu liuhusi programa PNDS.

Nune'e, durante tinan 2, Governu hamutuk ho PNDS inklui autoridade Munisípiu, Postu, Suku no Aldeia, konsege harii Uma Naroman ba Povu (UNP) regular tipu kuartu-2 no kuartu-3 pur-volta rihun 5 resin, inklui UNP Plus A no B iha teritóriu laran tomak inklui mós ho programa seluk hanesan dada bee moos ba komunidade no reabilitasaun Sede Suku.

"Ita hakarak rezolve programa sira hanesan ne'e ba ita nia komunidade, Governu hatene bazeia ba dadus uma iha timor laran modelu hanesan, ami nia reseu mak ita halo mais seidauk atinji ita nia metas, maibé ho esperansa katak di'ak ba povu, Governu sé de'it mak mai bele kontinua", nia afirma

Nune'e, Sekretária Ezekutiva ST-Programa Nasionál Dezenvolvimentu Suku (PNDS) Nasionál, Claudina Soares Pinto, subliña, Governu iha dever atu harii uma ba nia povu sira ne'ebé hela iha uma kondisaun la seguru.

"Governu hakarak halo duni ida ne'e (UNP) fó ba família sira ne'ebé hela iha kondisaun (uma aat) ida ne'e, ita boot sira nia direitu konsagra ona iha Konstituisaun RDTL, fó ita boot sira hotu, maibé ho fazeada", nia dehan

Representante Benefisiariu UNP faze daruak iha Suku Triloka, Faustina da Costa sente kontente, tanba bele hetan uma kondisaun dignu no seguru husi Governu.

"Obrigado ba Governu harii ona uma ba ha'u hodi hela, maibé ha'u husu Governu labele haree to'o de'it ha'u, maibé ajuda mós ha'u nia maluk sira ne'ebé seidauk hetan uma", nia rekomenda

Enkuantu UNP 9 ne'ebé implementa iha Suku Triloka, pertense ba benefisiáriu Faustina da Costa, Virgildo Bosco da Silva, Domingos Freitas, Ricardo da Silva, João Cansio Ximenes, Luisa da Silva,  Maria Frietas, Josefina da Conseição, no Luiges da Silva, ne'ebé konsidera moris iha uma antes ne'ebé kondisaun ladignu no moris nu’udar agrikultór.

Entretantu UNP 9 iha Suku Triloka ho tipu kuartu-3 hotu, kada uma ida konstrui ho orsamentu rihun US$17.034. (*)

Rate this item
(0 votes)
Last modified on Tuesday, 31 January 2023 20:23
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items