"Exekusaun orsamentu jerál estadu (OJE) dala barak ita boot sira rona sira bele exekuta maibé iha Janeiru ita exekuta ona pur volta 40 miloens dolares ne'e inklui ona salariu ba veteranus, viajen ba li'ur, viajen lokais, signifika katak sistema ne'e funsiona ho di'ak", dehan Ministru Finansas (MF), Rui Gomes hafoin sorumjutu ho Primeiru Ministru, Taur Matan Ruak iha palasiu governu, segunda (30/01).

Ministru Finansas mós ohin hato'o mós ba Primeiru Ministru, Taur Matan Ruak kona-ba atu asinatura akordu ho Austrália ne'ebé sei akontese iha semana oin.

"Akordu ida ne'e kona-ba US$20 milhões, ne’ebé ita sei simu husi Austrália hanesan doasaun ka apoiu ida ita nia projetu bolsa damãe sira, Programa Nasional Dezenvolvimentu Suku (PNDS) no trabaladores selesionais", nia dehan.

Alende ne’e, Ministru Rui Augusto Gomes mós infoma kestaun espekulasaun ba inflasaun iha Timor-Leste ba Primeiru Ministru, Taur Matan Ruak.

"Kestaun ko'alia uitoan kona-ba inflasaun ne'e sai tema jerál ba debate iha fatin-fatin, maibé ami esplika mós ba PM tuir saida mak akontese ne'e sai espekulasaun la'ós tanba efeitu ba inflasaun ikus ita haree hahú husi Novembru 2020 nian", dehan Rui.

Maske operasionaliza tiha ona portu tibar, maibé nia tendénsia tun hahú husi fulan-Jullu, Portu tibar ne'e multifunsaun iha fulan-setembru eh ofisiálmente inaugura iha fulan-outubru tinan 2022, tanba ne'e nia inflasaun ladún boot ona.

"Espekulasaun mezmu ita operasionaliza presu ne'ebé deteta husi Ministéru Finansas liuhusi nia diresaun jerál estátistika hatudu, monu husi 8% mai 6% ne'e faktus ba ita boot sira bele asesu pajiña diresaun jerál estátistika signifika nia efeitu ne'e ladún", nia haktuir.

Karik efeitu ne'e iha, maibé ki’ik entaun Ministéru finansas halo simulasaun mudansa iha aplikasun taxa 2,5% to'o 5% ne'e implika importasaun  ba bens sira husi li'ur.

"Entretantu ami haree katak efeitu husi ida ne'e nia akresenta 55 centimus ba foos kaut ida 25 kilo grama, uluk foos ne'e US$13 dolares, kada 25 kilo grama, tuir loloos nia sa’e ba US$13, 55 centimus ne'e loloos, sa'e US$14 dolares amerikanu, saida mak ita asiste haree desparu invensaun sa'e makaas tebes", nia esplika.

Kuandu Timor-Leste tama ona Organizasaun Mundiál Komersiál (OMK) ho aplikasaun taxa 2,5% katak, sei la book internamente enkuantu sai membru OMK, hanoin ida ne'e mak urjensia atu introduz aplikasaun taxa sa’e ba 5%.

"Ita ko'alia ba buat rua, aplikasaun taxa mak ohin ha'u temi 5%, ita boot sira hatene, urjensia atu hatama ita hodi muda aplikasaun taxa, tanba ita la kleur tan tama ona ba OMK. Keta haluha 2008 ita nia aplikasaun taxa 6% ne'e ita hatun 2,5%, entaun ita uluk iha kapasidade muda mak iha 14 anus, ita laiha kapasidade ida ne'e ba kada ema ida nia konsiensia rasik", dehan nian. (*)