"Ita hatene situasaun loron 2 liubá produtu gazoliña latama mai Baukau, ami fornesedór na'in-8 ne'ebé iha Baukau, agora stock gazoliña laiha hotu kedas", informa na'in ba Postu Abastesementu Manudare Fuel.Lda, Helio Francisco da Costa, iha kna'ar fatin Vila Antiga, Tersa (24/01).
Stock produtu gazoliña hotu, fó impaktu boot ba produtividade ekonomika nian iha Timor-Leste, tanba dadaun populasaun maioria depende ba gazoliña.
"Husu parte relevante, atu atensaun ba preukupasaun sira ne'e", nia rekomenda
Motorista Deonizio da Silva sente triste, tanba bele fó impaktu ba transporte públiku sira ne'ebé halo sirkulasaun to'o baze lori sai povu ki'ik sira nia produtu ba asesu merkadu.
"Sé mina laiha oinsa ami halai, ami tenke para, labele tula tán penungan", nia hatete
Nune’e, husu ba Governu atu konsidera situasaun refere ho seriu, atu labele fó impaktu ba ekonomia nasaun.
Tuir observasaun www.tempotimor.com iha tereñu nota, postu abastesementu iha Baukau hamutuk 8, maibé iha abastesementu balun stock produtu gazoliña hotu, no balun sei iha, maibé, tuir informasaun husi traballadór sira katak, posibilidade sei hotu iha loron ne'e (24/01). (*)