Xefe Suku Fatulia, Angelinho Moisés Pereira, informa, iha loron 22 fulan-dezembru tinan-2022, Governu halo ona inaugurasaun ba eletrisidade iha Fatulia, ba Aldeia-3 iha área Ossowake ne'ebé antes ne'e, seidauk asesu ba eletrisidade.
"Só uma 7 mak seidauk asesu eletrisidade, tanba do'ok husi liña jerais estrada nian", dehan nia iha resintu administrasaun Baukau, Tersa (17/01).
Maibé, autoridade suku kontinua rekomenda ba parte relevante liu-liu Eletrisidade Timor-Leste, Empreza Públiku (EDTL, E.P) atu fornese liña eletrisidade ba komunidade sira ne'ebé seidauk asesu.
Komunidade uma 7 ne'ebé seidauk asesu eletrisidade, iha Aldeia Ossowake, nune'e parte autoridade Suku orienta ona ékipa atu rekolla dadus hodi submete ba EDTL, E.P atu bele simu solár panél.
"Agora ami rekolla hela dadus, tanba bazeia ba informasaun husi EDTL sira atu fornese solár panél ba sira", nia informa
Alende mós, kompaña lokál Ruvic ne'ebé halo reabilitasaun ba estrada ligasaun husi Fatulia ba Suku Uaimori, pur-volta 27 kilometru, dadaun paradu no konsidera abandona servisu.
"Ruvic ka'er iha 2015 to'o agora, durasaun tempu ne'e tuir informasaun, sira extende hela ba kompaña ida ne'ebé agora ka'er ne'e", nia informa
Reabilitasaun ne'ebé tarde, sei fó impaktu ba komunidade nia viajem, tanba kondisaun estrada aat, susar atu transporta povu nia produtu ba merkadu.
"Estrada konsidaun ladun di'ak, tanba diresaun husi Venilale to'o Uaimori distánsia dook tebes", nia hatete
Entretantu, Suku Fatulia iha Aldeia-4, hanesan Bahadato, Uaitobonu, Uatuliana inklui Ossowake, ho nia totál populasaun hamutuk rihun 2903, husi Xefe família 701. (*)