Ministru Turizmu Komérsiu no Industria (MTKI), José Lucas do Carmo da Silva dehan, negosiante ne'ebé partisipa iha feira fa’an produtu lokál no produtu sira seluk, kalan ida bele hetan US$200 no dalaruma US$ 800 dólar Amérikanu.

“Mai atualiza progresu feira produtu lokál no divertimentu ba exelensia Primeiru Ministru, Taur Matan Ruak, ne’ebé sai nu'udar prezidente komisaun organizadora ba feira produtu lokál’, dehan nia hafoin sorumutu ho Primeiru Ministru, Taur Matan Ruak iha Palasiu Governu, tersa (17/01).

Nia haktuir, juventude sira mós hato’o mensajen katak, atividade feira ne’e, oportunidade ne’ebé konsidera importante, tanba iha benefisiu ba negosiante no artezenatu sira.

"Grupu juventude sira hato'o nia mensajen katak, oportunidade ne'e importante tebes ba sira kona-ba divertimentu iha komunidade nia leet, mensajen seluk ita simu husi benefísiariu artezenatu no restor sira katak, feira ne'e benefísiu tebes ba sira", nia haktuir.

Nune’e, benefísiariu sira husu ba governu atu kontinua realiza atividade sira hanesan ne’e, atu sira bele kontinua fa’an produtu.

"Sira fa’an 24 oras hahú husi dader to'o kalan tuku 12, artezenatu dehan, kalan ida hetan US$150 to'o US$400 dólar Amérika, sira husu governu atu mantein nafatin atividade sira hanesan ne’e, tanba bele ajuda mós sira", nia hatutan.

Feira ne’e, hala’o iha Portu Dili nian, ne’ebé hahú iha loron 20 fulan-dezembru tinan 2022, no sei remata iha 20 fulan-janeiru tinan 2023.

Tanba ne’e, governu sei kontinua deskute planu ba atividade feira atu bele implementa mós ba iha kada Munisípiu.

"Ba oin ami sei halo diskusaun kle'an atu diverti fa’an na'in sira ho múzika iha feira loron sesta no sabadu kalan, bele mós sei realiza feira iha Munisípiu sira, atu fó oportunidade ba negosiante sira fa’an nia produtu lokál", nia hakotu. (*)