“Ami-nia dadus ikus kona-ba levantamentu veíkulus estadu husi tinan 2019-2020, hatudu hahú husi tinan 2002 até 2020, Governu Timor-Leste gasta ona osan US$125 milhões hodi sosa karreta estadu foun hamutuk 3,415 unidades”, Haktuir Rui Gomes iha informasaun ne’ebé www.tempotimor.com asesu iha pájina ofisial Ministru Finansas, Rui Augusto Gomes, kinta (12/01).
Nia fo ezemplu, hahú husi tinan 2000 até 2020, Governu Timor-Leste gasta ona osan tokon US$257 ba manutensaun veíkulus no sosa kombustivel, ne’e hatudu kada tinan gasta tokon US$14,3, ka fulan-ida gasta tokon US$1,2, ka loron ida gasta rihun US$57 ba de’it mina no manutensaun veikulus estadu.
Fasilidade karreta estadu ne’e mós, em vez de rezulta ba kresimentu iha prestasaun servisus ba públiku ne’ebé aas, maibé infelizmente hatodan fali kapasidade finanseira estadu nian.
Despesas ne’e, halo orsamentu ba mákina estadu hetok aas tebes no dezvia despesas ne’ebé tuir loloos aloka ba setór produtivu sira hodi dudu kresimentu ekonómiku.
Nune’e, iha fulan-setembru tinan 2021, Oitavu Governu Konstitusionál opta polítika foun liuhusi aprovasaun Dekretu Lei kona-ba subsídiu transporte, hodi transforma kustu operasionál karreta estadu ba subsídiu transporte.
Aleinde ne’e, Governu mós aprova rezolusaun Governu nian ho númeru 130/2021 kona-ba jestaun no realokasaun veíkulus estadu.
Rezultadu husi introdusaun polítika foun ne’e mak iha tinan kotuk, Governu konsege halo poupansa iha despesas públikas besik tokon US$2 iha kombustível no manutensaun karreta estadu. (*)
