Tanba, tuir informasaun ne’ebé www.tempotimor.com asesu iha pájina ofisial Ministru Finansas, Rui Augusto Gomes katak, ohin loron 12 fulan-janeiru tinan 2023, Ministru Finansas, Rui Gomes ofisialmente halo ona abertura ba proposta leilaun ba faze XV ba veíkulus estadu hamutuk 615 unidades liuhusi modalidade leilaun konkursu públiku ho maneira transparente no akuntavel.
Atividade leilaun ne’e, implementa bazeia ba Dekretu Lei númeru 32/2011 kona-ba jestaun no alienasaun bens moveis estadu no diploma ministerial númeru 15/2012 kona-ba manuál jestaun no alienasaun patrimóniu moveis estadu.
Tuir Ministru Finansas, Rui Augusto Gomes nia diskursu katak, atividade leilaun ne’e ho objetivu atu salva guarda kondisaun beins moveis estadu nomós sai nu’udar fontes rekolla reseitas doméstika hodi bele sustenta estadu atu bele iha kapasidade finanseira hodi finansia programa no atividades sira.
Governu halo leilaun hodi kontinua poupa no redus despesas iha kustu operasionál uzu karreta estadu ne’ebé kada tinan iha tendénsia sa’e hela de’it.
Nia fo ezemplu, hahú husi tinan 2000 até 2020, Governu Timor-Leste gasta ona osan tokon US$257 ba manutensaun veíkulus no sosa kombustivel, ne’e hatudu kada tinan gasta tokon US$14,3, ka fulan-ida gasta tokon US$1,2, ka loron ida gasta rihun US$57 ba de’it mina no manutensaun veikulus estadu.
“Ami-nia dadus ikus kona-ba levantamentu veíkulus estadu husi tinan 2019-2020, hatudu hahú husi tinan 2002 até 2020, Governu Timor-Leste gasta ona osan US$125 milhões hodi sosa karreta estadu foun hamutuk 3,415 unidades”, nia afirma
Despesas ne’e, halo orsamentu ba mákina estadu hetok aas tebes no dezvia despesas ne’ebé tuir loloos aloka ba setór produtivu sira hodi dudu kresimentu ekonómiku. Fasilidade karreta estadu ne’e mós, em vez de rezulta ba kresimentu iha prestasaun servisus ba públiku ne’ebé aas, maibé infelizmente hatodan fali kapasidade finanseira estadu nian.
Nune’e, iha fulan-setembru tinan 2021, Oitavu Governu Konstitusionál opta polítika foun liuhusi aprovasaun Dekretu Lei kona-ba subsídiu transporte, hodi transforma kustu operasionál karreta estadu ba subsídiu transporte.
Aleinde ne’e, Governu mós aprova eezolusaun Governu nian ho númeru 130/2021 kona-ba jestaun no realokasaun veíkulus estadu.
Rezultadu husi introdusaun polítika foun ne’e mak iha tinan kotuk, Governu konsege halo poupansa iha despesas públikas besik tokon US$2 iha kombustível no manutensaun karreta estadu.
Serimónia ne’ebé realiza iha salaun Diresaun Jerál Patrimóniu Estadu, Balide marka mós prezensa husi Vise-Ministru Finansas, António Freitas, Provedor Direitu Humanu no Justisa, Virgílio Guterres, reprezentantes Komisáriu Komisaun Anti-Korrupsaun, Inspetór Jerál Estadu, Inspetór Jerál Ministériu Finansas, Prezidente no Membrus Komisaun Leilaun inklui Observadór no rekerente sira. (*)
