Tuir informasaun ne’ebé www.tempotimor.com asesu iha pájina SEFOPE-Diresaun Nasional Empregu Exterior katak, serimonia ne’e hala’o iha salaun Timor Lodge Kumoro, no kandidatu traballador na’in 50 ne’e sei aranka ba Korea Súl iha loron 15 fulan-janeiru tinan 2023.
Nune’e, Sekretária Estadu Formasaun Profisionál no Empregu, Alarico de Rosario, apela ba joven Timoroan na’in 50 ne’ebé hetán tán oportunidade atu ba servisu iha Korea Súl área peskas nian, atu hatudu komportamentu servisu ne’ebé di’ak, respeita ema nia lei, kultura no mós labele halai ses husi sistema, nune’e bele hetán nafatin konfiansa husi empregadór sira iha Korea Súl.
Tanba, polítika Governu liu-husi SEFOPE haruka joven Timoroan ba servisu iha ema nia rain la’os de’it atu buka osan, maibé ba buka aprende tán esperensia foun hodi fila mai dezenvolve nasaun Timor-Leste.
Agradese ba Governu Korea Súl ne’ebé nafatin iha komitmentu hodi rekruta joven Timoroan sira ba hetán empregu iha Korea Súl hodi bele hadi’a sira nia ekonómia família no hasa’e kresimentu ekonomía nasaun.
Nune’e mós Diretór Diresaun Nasionál Empregu Exteriór, Filomeno Soares hatete, serimónia asina deklarasaun ne’e hanesan konkordansia ida ne’ebé família traballadór halo katak, aseita ita nia la’en, ka oan atu ba servisu iha Korea Súl la’os Governu maka obriga, nune’e mosu problema ruma parte rua iha hotu responsabilidade atu rezolve. (*)