Tempotimor (Dili)-Loron 11 fulan-janeiru tinan-2023, ékipa konjunta kompostu husi Autoridade Inspesaun no Fiskalizasaun Atividade Ekonómika, Sanitária no Alimentár, Institutu Públiku (AIFAESA,I.P) no Diresaun Nasionál Reguladóra Komérsial no Protesaun Konsumidór, notifika ona empreza 3 iha Dili, tanba deskonfia manipula folin sasan.
Tanba, ekipa konjunta halo ona apreensaun ba produtu masin-midar falun-53 (Kg 1) ne'ebé Díli Mart komersializa ho presu $ 1.75, nune'e ékipa konjunta konsidera empreza inventa presu ka halo espekulasaun ba presu.
Nune’e, ékipa notifika ona empreza atu halo klarifikasaun no aprezenta faktura kompra hodi hatene marjen ne'ebé empeza ne'e rasik utiliza hodi implementa presu la tuir regra ne'ebé iha.
Alende ne'e, ékipa konjunta mós notifika empreza rua seluk, hanesan supermerkadu W4 no ROCA Supermarket atu aprezenta faktura ba nesesidade bazíka sira, tamba deskonfia iha aumenta presu.
Asaun intervensaun presu ne'e, AIFAESA kontinua intensifika atu kontrolu operdór ekonómika sira ne'ebé nafatin halo tentativa aproveita situasaun hodi prátika aktu espekulasaun ba presu no asambrankamentu ba produtu sira.
AIFAESA mós nafatin bolu atensaun ba operdór ekonómiku sira atu labele tenta hodi kontra regulamentu sira ne'ebé vigór atu laprejudika operdór ekonómiku sira nia atividade komersializasaun no kontinua garante ba konsumedór presun justu ne'ebé Lei haruka. (*)