"Totál orsamentu ba tinan-2022 nian, ema ne'ebé ami hasoru hamutuk rihun 10.990, ho nia orsamentu ne'ebé ami hatama iha kofre estadu hamutuk rihun US$151.846", relata Diretór DNTT Munisípiu Baukau, Roberto da Cruz iha kna'ar fatin, Kuarta (11/01).
DNTT Baukau rekolla reseita iha fulan-janeiru hamutuk US$22.340, fevreiru iha US$13.910, marsu iha US$12.850, abril iha US$7.913,50, maiu iha US$8.130, juñu iha US$8.430, jullu iha US$19.910, augusto iha US$14.325, setembru iha US$14.302,50, outumbru iha US$10.937,50, novembru iha US$9.265, no fulan-dezembru iha US$9.532,50.
DNTT Baukau rekolla osan hirak ne’e husi inspesaun ba karreta no motor, tranjektu públiku, karta kondusaun ba karreta no motor, inklui rejistu foun.
"Husi fulan hira ne'e, fulan janeiru taxa sa'e, tanba iha tinan-2021 situasaun covid-19, entaun balun la mai selu, nune'e iha janeiru tinan-2022 ne'e mak sira mai selu, renova, multa entaun taxa sa'e", nia informa
Alende ne’e, apela ba motorista sira iha Baukau ne'ebé husi tinan-2014 to'o tinan-2022 fulan-augustu rejistu ba karta kondusaun nian mak dadaun sei uza karta kondusaun provisóriu, bele hakbesik aan ba diresaun DNTT Munisípiu, hodi foti karta kondisaun orijinal, tanba dadaun iha ona blanku ba karta kondusaun orijinal.
Enkuantu ba motorista ne'ebé hahú rejistu ba karta kondusaun nian husi fulan-setembru tinan-2022 to'o agora, DNTT seidauk bele fó karta kondusaun orijinal, tanba blanku la to'o, maibé sei kontinua esforsu hodi rezolve.
"Karta kondusaun blanku iha ona, ami simu husi diresaun nasionál 4000 mak agora iha ne'e, atu atende ba husi tinan-2014 nian mai to'o tinan-2022 fulan-augostu, ami buka meios atu rezolve", nia dehan.
Maibé, DNTT Munisípiu Baukau iha printer ida de'it, nune'e loron ida obrigadu tenke atende de'it ema na'in-50.
"Printer mak ida de'it, entaun kada loron ami atende ema na'in-50, karik kolega sira mai forma to'o loraik mós dala ruma la atende, konsekuensia mak nune'e", nia argumenta. (*)