"Sasan seluk ami fa’an iha ne'e folin normal, maibé minuman sira hanesan fanta, cocacola mak folin sa'e, agora ema dada iis la sosa ona, ami fa’an semana ida ona mós ema la sosa", dehan nia iha servisu fatin, Vila Nova Tirilolo, Sesta (06/01).

Folin bebidas hanesan fanta no cocacola dadaun iha Dili kaixa ida ho folin US$18, nune'e fa’an tutan iha Munisípiu kaixa ida folin US$18.75 sentavus.

Alende mós folin masin midar dadaun iha Baukau saku ida US$90, tanba folin iha Dili saku ida US$80.

"Tinan kotuk iha dezembru semana kotuk ami fa’an iha ne'e (fanta, cocacola) kaixa ida US$7.00, maibé foin loron tolu liuba iha Dili folin sa'e ona", nia hatete

Husu Governu atu hasa'e de'it folin tabaku, maibé folin bebidas hanesan fanta, cocacola, (minuman ringgan) sira mantein folin normal, nune'e povu ki'ik bele sosa kotu.

"Orsamentu ba servisu na'in sira laduun di'ak, agora ita hasa'e makas liu kedas hanesan ne'e ema sosa mós dada iis", nia argumenta

Diretór empreza Roman Grigio, Estevão Paulo Sarmento, hatutan, folin sasan lolos   sei normal, maibé kauza husi taxa iha portu tibar karun, nune'e fa’an iha baze aumenta folin hodi bele hetan rendimentu oituan.

"Kontainer agora karun loos, uluk kotainer ida selu US$250-350, agora sa'e ona ba US$750 balun sa'e ona US$1000 resin ona, tanba ne'e mak presu sasan tenke sa'e bazeia ba kontainer karun", nia hatete

Husu Governu atu reduz taxa iha portu tibar, tanba kauza folin sasan sa'e iha merkadu halo povu sai vítima.

"Portu tibar ne'e rai Timor nian, maibé Xina mak halo, entaun presu ne'e labele hatun, se selu karun, ita nia povu sei terus", nia argumenta

Enkuantu, fós kilo 25 saku ida iha Munisípiu Baukau ho folin US$14.00 to'o US$15.00, mina modo litru-5 ho folin US$9.00 to'o US$10, manu tolun rak-ida folin US$6.00 to'o US$6.50 sentavus. (*)