Tanba, durante selebrasaun tinan-foun hahú iha loron 30 fulan-dezembru tinan-2022, to'o loron 04 fulan-janeiru tinan-2023 kuaze eletrisidade iha Baukau mate lakan.
"Hanesan ita haree ba loos mai loos, halo ita povu lakontente, tanba estraga sasan eletrónika sira, hanesan jelera uza gás, wainhira lakan tiha mak derepente mate ne'e bele estraga", dehan kominidade husi Suku Tirilolo, Claudio Neto, iha vila nova Baukau, Kuarta (04/01).
Husu parte EDTL atu servisu di'ak liután iha futuru, tanba impaktu husi eletrisidade mate lakan, dalaruma la halo kontrola ho di'ak.
"Sira tenke la'o, haree fiu sira ne'e atu haree kotu karik halo di'ak tiha mak loke listrik dala ida para labele fó dezvantajen", nia rekomenda
Xefe Unidade EDTL.EP Bauka, Edegar da Silva, informa, relasiona eletrisidade mate lakan husi loron 30 fulan-dezembru tinan-2022 to'o loron 04 fulan-janeiru tinan-2023, tanba kauza husi udan anin rezulta aihun sira tohar hakotu fiu liña eletrisidade nian ba Postu Administrativu sira.
Maibé, tekníku EDTL.EP Baukau kontinua esforsu hodi servisu iha tempu kalan no loron konsege normaliza ona liña eletrisidade ne'ebé hetan estragus iha Postu 5, dadaun eletrisidade hahú lakan normal, maibé ba Postu Baguia seidauk finaliza normalizasaun, tanba iha loron 04 fulan-janeiru tinan-2023 parte madrugada rezulta tán fiu kotu, kauza husi ai hanehan.
"Ha'u nia lia badak mak ne'e, hato'o ba komunidade deskulpa, keta ami nia atendementu lamelorra karik, bele hato'o iha ami nia pajína EDTL.EP para ami mellora liután iha tinan-ida ne'e", dehan iha kna'ar fatin vila nova.
Liña eletrisidade ne'ebé hetan estragus durante selebra tinan-foun iha Postu Baukau Vila, iha área Deiwake rezulta ai-rin eletrisidade 2 tohar, inklui iha área Uaniki Suku Bahu fiu kotu, maibé finaliza ona eletrisidade lakan normal ona.
Enkuantua iha Postu Laga, Kelikai, Vemasse no Veninale, hetan de'it estragus asesor eletrisidade nian, maibé parte EDTL.EP Baukau finaliza ona nia prosesu, dadaun eletrisidade lakan normal. (*)