"Orsamentu ba merenda eskolár iha mudansa ona, tinan-ida ne'e kada alunu loron ida US$0,25 mais tinan-oin orsamentu iha mudansa ona sa'e ba US$0,42 centavus", dehan nia iha salaun apuramentu Baukau, Tersa (20/12).
Tuir planu tinan-2023 servisu edukasaun Baukau, sei dezemina mata-dalan diploma programa merenda eskolár husi Ministru Administrasaun Estatál (MAE) nian ba dirijente eskola hafoin halo implementasaun.
Nune’e, tinan-2023 orsamentu programa merenda eskolar ba loron efetivu 164 nian iha Munisípiu Baukau, ho nia orsamentu hamutuk US$951.934.50 ba eskola 309, ne’ebé kompostu husi eskola Katóliku, eskola fundasaun, inklui eskola Públiku.
Entretantu programa merenda eskolar tinan-2022, dirijente eskola sira konsege ezekuta di'ak, tanba atinji to'o ona pursentu 94 tuir loron efetivus 70 nian.
"Iha 2022 orsamentu tranferensia públika ne'ebé aloka mai programa merenda eskolár US$714.187,00 to'o iha fim do anu ita iha balansu US$61 mil", nia hatete.
Orsamentu balansu husi programa merenda eskolár tinan-2022 nian, servisu finansas Munisípal aségura hela iha konta bankária eskolár hodi kontinua ezekuta iha tinan-2023.
Prezidente Autoridade Munisípiu Baukau, Olivio Freitas, hatutan, iha tinan-2023 orsamentu ba programa merenda eskolár hahú mudansa, tanba kada estudante sei hán iha eskola loron ida ho osan US$0,42 sentavus.
Husu dirijente sira atu ezekuta orsamentu refere ho resonsabilidade hodi fó hán estudante sira tuir lei nia hakarak.
"Fó han ba labarik sira tuir menu, ne'ebé hasai, labele halo tuir fali ema ida nia hakarak, tenke tuir menu hahán ne'ebé estabelese ona," nia hakotu. (*)
