Tuir informasaun ne’ebé www.tempotimor.com asesu iha pájina Gabineti Ministériu Solidariedade Sosial no Inklizaun katak, ohin loron tersa 06 fulan-dezembru tinan 2022, ekipa hahú halo ona pagamentu subsídiu US$200 ba komunidade sira iha Kamea.

Nune’e, Ministra Solidariedade Sosiál no Inkluzaun, Armanda Berta dos Santos, hatete, subsidiu US$200 ne’e, foin pela primeira vez oitavu governu konstitusionál mak atribui ba uma-kain iha tinan 2022, liuhosi subsídiu ne’ebé sei atribui tinan ida dala ida.

Nia dehan, Governu la iha buat barak atu fornese ba ita boot sira, maibé ida ne’e mak kbi’it atu fó ba komunidade sira iha fim do ano.

Maibé, osan ne’e fó ba uma-kain ne’ebé ho rendimentu US$500 mai kraik, ba sira ne’ebé rendimentu US$500 ba leten sei la simu.

Xefe Suku Kamea, Matos da Costa hato’o agradesementu ba VIII Governu, liu-liu Ministériu Solidariedade Sosiál no Inkluzaun, ne’ebé hili ona Suku Kamea hanesan fatin ba lansamentu pagamentu subsídiu fim do ano ba uma-kain.

“Ami iha 3.310 uma-kain (benefisiárius) ho ninia orsamentu US$662.000, ne’ebé kompostu husi aldeia 13, ho nune’e ami sei halo esforsu tomak hodi hala’o pagamentu ho di’ak no tuir kalendáriu ne’ebé mak iha”, nia esplika

Entertantu, tuir dadus benefisiáriu iha Munisípiu Díli ho totál, 67,542, ne’ebé ho ninia orsamentu US$13,508,400.00.

Iha abertura ne’e, prezensa husi Vise-Primeira Ministra no Ministra Solidariedade Sosiál no Inkluzaun, Armanda Berta dos Santos, akompaña husi Prezidente Autoridade Munisípiu Díli, Guilhermina Filomeno Saldanha Ribeiro. (*)