Tuir informasaun ne’ebé www.tempotimor.com asesu iha pájina ofisial Ministéiru Turizmu Komersiu no Industria (MTCI-sigla portugés), katak, ohin loron 01 fulan-dezembru tinan 2022, kompaña distribuidor, Riverside Unipesoal Lda, ne’ebé hetan kontratu husi entidade implementador MTCI, hahú distribui ona ai-han ba benefisiáriu sira iha Balibar.

Tuir kontratu kompaña ne'e, distribui ba benefisiáriu sira iha Suku Balibar hamutuk 1.671, ne’ebé kompostu husi Aldeia Tancae 439, Loriko 448, Fatuloda 373 no Lakoto 411 benefisiáriu.

Produtu ne'ebé fahe ba benefisiáriu ho 75% mai husi produtu lokál no 25% produtu husi rai liur, nune’e tuir kotasaun, kompaña sei fahe produtu item 18 kompostu husi produtu proteina, produtu karboidatu, produtu ijiene pessoal no rodutu femenina.

Nune’e, Xefe Suku Balibar, Afonso Pereira agradese ba oitavu Governu Konstituisional, tanba liu husi programa Cesta Bázika bele apoiu ai-han ba komunidade sira ne'ebé dadaun enfrenta hela aihan menus no apresia mos governu nia polítika ne'ebé valoriza agrikultór lokál sira nia produtu.

"Ha'u agradese ba governu nia hanoin, tanba bele implementa programa Cesta Bázika no sosa produtu sira ne'ebé komunidade sira kuda rasik no fahe fali ba sira liu husi programa ne'e, hodi apoiu komunidade sira ne'ebé ohin loron balu ai-han la to’o iha sira nia família, se bele programa ne kontinua nafatin ba oin", nia husu

Nia mós garante distribuisaun Cesta Bázika iha Suku Balibar sei la’o ho susesu, tanba komunidade sira kontenti ho produtu husi kompaña, kona-ba lista reklamante sei kordena ho kompaña atu buka solusaun.

Benefisiária, Angelina Martins sente kontenti no agradese ba governu, tanba bele apoiu ona sira nia nesesidade liu husi programa Cesta Bázika no rekomenda ba governu atu kontinua programa ne'e ba oin.

 “Ha’u senti kontenti no agradese ba governu, tanba bele hanoin ami, hodi fahe ona hahan, ami husu governu se bele kontinua ba oin hodi ajuda netik ami", nia espresa. (*)