Nune’e, Sekretáriu Estadu Kooperativa (SEKOOP), Elizário Ferreira, husu ba produtor sira atu kontinua nafatin kafé nia hun sira, tanba kafé ne'ebé dadaun fo fuan ne'e, kafé ida ne'ebé beiala sira kuda hela ba jerasaun sira.

"Lansamentu ida ohin ne'e parte ida husi promosaun atu promove kafé Timor nian, ita hakarak produtu Timor sai hanesan Identidade Timor no segundu mak promove sándalo, terseiru mak kakauk, tanba ita mós bele promove e baunila e parte sira ne'e hotu, produtu ne'ebé iha promove sei lori ba, maibé nafatin promove katak, sira ne'e orgániku", dehan nia bá jornalista iha Tibar, kinta (18/11).

Maibé, exporta kafé ba estranjeiru la'os pela primeira ves, tanba Kooperativa lubuk ida mak halo ona ba estranjeiru hanesan nasaun Korea do Súl no seluk tan.

"Alende ne'e, exportasaun ne'ebé parte ida atu motiva produtor kafé sira katak, ita iha ona merkadu, tanba ne'e tenke badinas nafatin kuida kafé sira halo manutensaun ba kafé sira signifika hamoos ninia du'ut sira atu bele fo fuan ne'ebé di'ak inklui mós halo nia prosesamentu ne'ebé di'ak, nune'e merkadu labele rejeita ita nia produtu", nia afirma

Tanba ne’e, Sekretáriu Estadu Kooperativa (SEKOOP), Elizário Ferreira mós husu ba exportadór sira atu mantein kualidade hodi asegura no buka nafatin agrikultór sira atu bele produtu kafé ne'ebé kualidade hodi oferese ba merkadu Internasionál husi kuantidade no sustentabilidade ne'ebé di'ak hodi fo benefisiu ba produtor kompaña no Kooperativa sira.

Nune'e, Jeneral Maneger Outspam Agro Timor Unip. Lda, Chaytaia Varma, hatete, parte sira hakarak ajuda produtor kafé iha Timor-Leste liuliu Kooperativa sira hodi hadi’a ekonómia iha rai laran.

"Nia hakarak hola kafé Timor-Leste ho razaun atu kontribui ba ekonómia sustentabilidade ba Kooperativa iha Timor-Leste liu-liu ba vida agrikultór sira", dehan nia

Nune'e, kafé ne'ebé kompaña Outspam hola sei lori ba Amérika hodi fa'an fali iha ne'ebá.

Prezidente Kooperativa Haburas Kafé Organiku C-HKO, Manuel Maia mós iha mehi boot ida hakarak halo ligasaun di'ak ho merkadu nasionál no Internasional sira.

"Ami nia Kooperativa ne'e hahú husi inisiu iha mehi boot ida hakarak atu halo relasaun merkadu nasionál no Internasional", nia dehan.

Nia haktuir, iha kompaña Olan ne'ebé responsável hola ne'e, sei haruka ba nasaun Alemaña ho Kontiner tolu ne'ebé haruka ona iha loron hirak liu ba, nune'e kompaña Outspam ne'ebé sei halo tan exportasaun hamutuk Kontiner hitu ba nasaun Amérika.

Kafé hirak ne'ebé C-HKO halibur mak iha territóriu Timor laran tomak no Munisípiu tolu ne'ebé exporta barak liu mak husi Aileu, Likisa no Ermera. (*)