“Ho alterasaun ne’e, benefísia sira husi apoiu ida-ne’e maka agregadu família sira ne’ebé rejistu ona to’o loron 28 fulan-fevereiru tinan 2022, iha livru Rejistu “Uma Kain”, ne’ebé daudaun ne’e iha territóriu nasionál no iha ne’ebé la iha elementu ida ne’ebé simu fulan-fulan, ho forma regulár, rendimentu sira ne’ebé mai husi serbisu iha instituisaun públika ka entidade privada, rendimentu emprezariál, rendimentu prediál ka rendimentu sira ne’ebé hetan husi prestasaun sosiál liuhusi rejime kontributivu, la kontributivu, ka espesiál, ne’ebé ninia valór aas liu duké dolar amerikanu 500”, dehan Ministru Prezidénsia Konsellu Ministru (MPKM), Fidelis Leite Magalhães iha Palásiu Governu, kuarta (09/11).
Hodi bele simu pagamentu ne’e, reprezentante “Uma Kain” ne’ebé benefisiáriu tenke subskreve deklarasaun ida hodi konfirma katak laiha membru ida husi Um-Kain ne’e, ne’ebé regulár simu fulan-fulan, rendimentu aas liu duké dolar amerikanu 500.
Reprezentante husi Uma-Kain ne’ebé subskreve deklarasaun ne’e, hatene katak saida mak deklara ne’e laloos, iha obrigasaun atu fó filafali valór ne’ebé simu ba Estadu, no bele hetan responsabilidade kriminál, tuir lei haruka. (*)