Diretór Jerál Prezidénsia Repúblika, Domingos dos Santos Amaral hatete, husi mina (kombustivel) ne’ebé fó ba kolejiu fatumaka ne'e la’ós atu rezolve problema kombustível iha terrenu, maibé ne'e hanesan insentivu ida ba sira.
“Ohin ami lori kombustível ne’ebé oferese husi Prezidente Repúblika, oituan ka barak ne’e hanesan intensivu de’it maibé apoiu barak liu ne’e mai husi Governu, tanbá ne’e kna’ar Governu nian, Prezidente Repúlika, ajuda de’it tuir kbi’it hodi aguenta atu hein Governu nia intervensaun”, dehan nia hafoin entrega kombustivel litru 5.000 bá Padre Elígio Locateli, iha Kolejiu Fatumaka, sesta (04/11).
Ba apoiu ne’e disponibiliza tanba misionáriu sira laiha rezerva (stock) kombustível, hodi fila rai komunidade nian.
Ho apoiu ne’e, Padre Locateli hatete, sira-nia parte agaradese tanba bele hakma’an difikuldade koléjiu Fatumaka nian.
“Bainhira ko’alia ho Prezidente Repúblika, nia aseita ha’u-nia proposta ne’e, hodi ajuda 5 mill, ne’e ha’u agradese, maske tinan ne’e atraza oituan”, afirma nia.
Tanba tinan 3 ona mak, kestaun kombustivel sai preokupasaun boot ba kolejiu Fatumaka hodi bele implmenta programa fila rai no irrigasaun tradisonál ba natar no tós sira.
Enkuantu iha tempu uluk buat hotu la'o diák, maibé ikus ne’e tratór sira susar los tanba liu ona tinan 20, ikus mai mosu ho pandemia Covid-19, povu atu selu USD 15 iha oras ida ba fila rai, ba povu susar.
Reprezentante Benefisiáriu husi Suku 5, Vicente de Sousa Boavida hatete, sira-nia parte agradese ba apoiu ne'ebé oferese husi Prezidente Repúblika, José Ramos Horta nia ekipa atu fasilita programa fila rai husi padre Locatelli, SDB ne’ebé servisu ho agrikultór sira, dezde tempu portuguéz to’o agora.
“Kombustível ne’e sei tau ba tratór hodi fila rai ba komunidade sira husi Suku Uailili, Gariuai, Bukoli, Loilubu, Umo-Ana-Ulo, Kairui Waimeana. Kada Suku, tratór 5 sei halo operasaun hodi fila rai durante fulan ida”, dehan nia.
Antes ne’e, Prezidente Repúblika ajuda mós finansiamentu ba Koléjiu Fatumaka, hodi hala’o missaun ajuda komunidade agrikultura no hadi’a tratór. (*)
