Print this page

Sesta Bázika Benefisiu Povu Kbi’it Laek iha Munisípiu Lautein

By November 06, 2022 534
Ai-han Sesta Bazika ne'ebe prepara hodi entrega ba Benifisiariu sira. Ai-han Sesta Bazika ne'ebe prepara hodi entrega ba Benifisiariu sira. Foto Suplay

Tempotimor (Lautein)-Reprezentante Benefisiáriu Programa Sesta Bázika husi Munisípiu Lautein, Augusto dos Santos hatete, programa Nasionál Sesta Bázika iha benefisiu ba povu tanba miniza povu nia susar durante ne'e sira enfrenta.

“Ha'u hanoin kuandu programa ida mai diretamente kona ami povu ami sente haksolok tanba ida-ne'e kontribui hodi bele ajuda povu sira pelu menus minimiza oituan ami-nia susar iha ami-nia moris no ha'u hanoin programa ne'e benefisia ba povu”, dehan nia iha Sentru Asalainu, Suku Fuiluro, Postu Aministrativu Lospalos, Munisípiu Lautein, segunda (31/10).

Ba totál família iha uma laran na'in-hitu (7), hahán ne'ebé simu husi Kompaña iha ámbitu programa sesta Bázika ne'e sei konsumu fulan ida nia laran.

“Iha uma laran ami na'in-hitu ne'ebé pelu menus ami hán la to'o fulan rua ba mais fulan ida-resin ne'e garante”, dehan nia.

Nune'e Diretór Kompaña Cipriano Felix Unip Lda, Arcenio da Costa Pinto Cabral, distribuisaun Programa Sesta Bázika ne'e sosa komunidade nia produtu sira no fahe filafali ba komunidade sira.

“Cesta Bázika daruak ita sosa produtu lokál husi ita-nia komunidade sira, ita sosa husi aldeia ne'e duni, inklui karau hotu no ami sei fahe ba benefisiáriu hamutuk 650 ba ohin loron nian”, afirma nia.

Hafoin liu tiha loron Nasionál hanesan Finadu no loron Santu sira-nian, Kompaña Cipriano Felix Unip Lda sei Kontinua fahe ba fali komunidade sira.

“Iha loron lima fulan-Novembru tinan 2022 mak ita kontinua fali, entaun ha'u Kontente ho komunidade sira iha ne'e hanesan fa'an na'in no simu filafal”, dehan nia.

Sekretáriu Estadu Kooperativa (SEKOOP), Elizário Ferreira husu ba komunidade sira iha Munisípiu Lautein atu kontinua haki'ak animál sira atu nune'e bele kontribui ba programa sira seluk iha Munisípiu Lautein.

Iha serimónia Distribuisaun Programa Sesta Bázika ne'e hetan akompaña husi Ekipa AIFAESA I.P, Ekipa PDHJ, no KAK. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items