"Kona-ba Cesta Bázika parte Sekretária Estadu mai RAEOA ne'e, orsamentu transfere hotu ona mai RAEOA, hein RAEOA mak halo ezekusaun, tanba lansamentu ba parte SEKOOP entrega ona ba RAEOA atu implementa, tanba ne'e parte SEKOOP hein atu monitoriza akompaña superviziona orsamentu hamutuk millaun US$2.2 de'it", dehan Sekretária Estadu Kooperativa, Elizário Ferreira, bá www.tempotimor.com segunda, (10/10).

Nune’e, SEKOOP sei fahe ai-han lokál ba populasaun metade iha RAEOA liuhosi implementasaun programa Cesta Bázika.

"Ne'e ba metade husi populasaun husi RAEOA hamutuk 80 mil ne'ebé SEKOOP sei Atende 40 mil nian, signifika reprezentante orsamentu $2.2", nia afirma

Prezidente Autoridade RAEOA, Arsenio Bano hatete, asina nota entendimentu ho Sekretáriu Estadu Kooperativa (SEKOOP) ne’e sei kobre iha rejiaun tolu ho nia komunidade hamutuk 40.000.

“Ohin hanesan Prezidente Autoridade asina memorandu entendimentu ho Sekretáriu Estadu ba Kooperativa (SEKOOP) iha faze ida ne’e sei kobre sub-rejionál tolu, mak Passabe, Oesilu no Nítibe, ho SEKOOP ne’e kobre komunidade hamutuk 40.000”, nia informa

Alende ne'e, iha Sub-rejiaun ka Kapitál Oecusse sei distribui husi Ministériu Turizmu Komérsiu no Industria ne’ebé sei asina mós nota entendimentu iha semana ne’e.

Iha tinan 2022, RAEOA mós hala'o ona distribuisaun Cesta Bázika no kontinua hala'o, tanba ne’e sei halo preparativu loke retenderizasaun hodi kompaña ne’ebé manán sei halo distribuisaun, ne’ebé sei termina iha fulan-dezembru.

Distribuisaun Cesta Bázika ba daruak, SEKOOP mós kobre iha RAEOA iha sub-rejiaun tolu no iha nia suku hamutuk sanulu ho komunidade 40.000 no orsamentu aloka ba programa nasional ne’e besik millaun US$2.

Liuhusi prosesu ne’ebé lei fó sai, Sekretáriu Estadu Kooperativa hahú hala’o ligasaun di’ak ho Komisaun Anti Korrupsaun (CAC), Provedoria Direitu Humanus ba Justisa (PDHJ) inklui Autoridade Inspesaun no Fiskalizasaun ba Atividade Ekonómika Sanitária no Alimentar (AIFAESA) hodi halo kontrolu ba nia prosesu sira. (*)