Print this page

SEKOOP ho Autoridade Covalima sei Estabelese Merkadu Tradisionál iha Fronteira

SEKOOP, Elizário Ferreira, ko’alia hela iha fronteira Postu Administrativu Fatumea, Munisípiu Covalima, kuarta (21/09). SEKOOP, Elizário Ferreira, ko’alia hela iha fronteira Postu Administrativu Fatumea, Munisípiu Covalima, kuarta (21/09). Foto Tempo Timor

Tempotimor (Covalima)-Sekretária Estadu Kooperativa (SEKOOP) hamutuk ho Administradór Munisípiu Covalima sei estabelese merkadu tradisionál iha fronteira hodi asegura bem estar komunidade antre Indonézia no Timor Leste.

Sekretáriu Estadu Kooperativa SEKOOP, Elizário Ferreira, afirma, liuhusi estabelesimentu merkadu ne'e, bele kria merkadu ida paz no komunikasaun ida ne'ebé di'ak entre rai rua (Indonezia Timor Leste).

"Tanba ne'e, Programa estabelesimentu merkadu iha fronteira sai Programa ida prioridade atu bele asegura bem estar ba ita nia populasaun espesifiku e ba komunidade rai rua (Indonézia - Timor-Leste) enjeral atu ba oin sai merkadu ida paz merkadu ida ba komunikasaun e merkadu ida bele asegura Turizmu ida ba Nasional no Internasional nian", dehan Elizário iha Postu Administrativu Fatululik Munisípiu Covalima, kuarta (21/09).

Tanba ne’e, Administrador Munisípiu Covalima konvida SEKOOP atu hahú hala'o planu oinsá instala merkadu iha fronteira Indonézia no Timor Leste.

"Vizita mai postu rua ne'e, hetan konvite ofisiál husi Administradór Munisípiu Covalima husu atu Sekretária Estadu halo vizita mai postu tolu, mak Fatumea, Fatululik inklui Tiliomar, ne'e tanba administrador Munisípiu haree no akompaña katak, Sekretaria do Estadu iha programa ida naran merkadu ba fronteira, tanba ne'e administrador Munisípiu entre Sekretária Estadu Kooperativa atu halo programa estabelesimentu merkadu iha fronteira", dehan nia.

Entermos de sosiu-ekonómiku sira iha relasaun kulturál, maibé benefisiu ekonómika ne'e dook, tanba parte husi ne'e ba de'it munisípiu mós dook parte ne'ebá (Indonézia - red) mós dook, entaun sei kria kondisaun sosiu-ekonómiku ne'ebé di'ak atu fó benefisiu di'ak ba rai rua ne'e hotu.

Alende ne'e, komunikasaun Seguransa entre Indonézia no Timor hatudu amizade ne'ebé di'ak, nune'e hafasil instala merkadu iha area fronteira ne'e rasik.

"Bainhira ha'u nia vizita mai fatin ida ne'e observa katak, ita nia populasaun rai rua (Indonézia Timor-Leste) liu-liu iha Fatumea kondisaun ida mak menus bee moos ho estrada ne'ebé maka ladún di'ak, maibé relasaun entre komunidade Fatumea ho komunidade postu sira Atambua nian di'ak tebetebes até amizade entre polísia ho Militár sira husi Indonézia até ita nia polísia la iha bee sira hakarak oferese bee ba ita nia populasaun sira, ne'e hatudu mo-moos katak, kooperasaun ida di'ak iha fronteira", nia salienta.

Nia hatutan, mekanismu estabelese merkadu iha fronteira ne'e, Koperativa sira iha Postu-Administrativu tolu ne'ebé antes ne'e eziste ona mak sei autór ba estabelesimentu merkadu iha fronteira ne'e rasik.

"Mekanismu ne'e, Kooperativa mak sei autór ba estabelesimentu merkadu fronteira, tanba loja sira ne'ebé tau iha ne'ebá Kooperativa ninia membru sira asegura ninia jestaun asegura ninia Funsionamentu e Membru sira mak oferese ninia produtu ba loja ne'e, atu parte rai rua ne'e bele sosa no Kontribui ba benefisiu parte rai rua ne'e ninian", nia afirma.

Nia akresenta, hafoin estabelese tiha merkadu, SEKOOP husu ba Membru Kooperativa no Administrador Postu Fatumea atu fa'an de'it sasán sira ne'ebé mak nasaun Indonézia presiza.

"Imi ba fa'an mak saida, tua sanulu, dellos, sprinballe sira ne'e iha Indonézia la iha, labele fa'an fali supermie sira ne'e no pressu Produtu ne'e bazeia ba normál iha ita nia rai laran nian, nune'e bele asegura benefisiu ", nia akresenta.

Alende ne'e, Administrador Postu Fatumea, Geraldo Orleans, hateten, objetivu Sekretáriu Estadu Kooperativa SEKOOP halo vizita ba Fatumea haree direta liña fronteira oinsá atu estabelese merkadu.

"Objetivu Sekretáriu Estadu mai iha postu Fatumea ne'e iha rua, mak atu haree direta liña fronteira loke merkadu tradisionál iha fronteira no ida seluk mak atu hasoru malu ho membru Kooperativa Raifutar iha postu administrativu Fatumea konsellu suku sira", dehan nia

Tanba, intensaun ba oin membru Kooperativa mak sei estabelese merkadu iha liña fronteira ne'e rasik.

"Ba futuru ekonomia iha postu administrativu Fatumea nian ne'e, tenke monu iha koperativa nia liman, tanba Kooperativa ne'e harii husi Povu hala'o atividade husi povu no benefisiu ne'e ba fali iha povu", nia salienta.

Tanba, liuhusi estabelesimentu merkadu iha fronteira sei minimiza komunidade la'o dalan ilegál ba Indonézia hodi buka moris.

Nune'e, Administrador Postu Fatumea informa iha semana oin sei submete proposta ba Sekretaria Estadu Kooperativa hodi fo ajuda oinsá estabelese merkadu iha liña fronteira. (*)

Rate this item
(0 votes)
Last modified on Thursday, 22 September 2022 12:58
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items