Print this page

MTCI Distribui Ona Cesta Bázika Faze Daruak ba Komunidade Ponilala

By September 19, 2022 2114
Komunidade Ponilala, simu hela ai-han Cesta Bázika husi ekipa Ministériu Turismu Komérsiu no Industria (MTCI). Komunidade Ponilala, simu hela ai-han Cesta Bázika husi ekipa Ministériu Turismu Komérsiu no Industria (MTCI). Foto Suplay

Tempotimor (Dili)-Ministeriu Turismu, Komérsiu no Indústria (MTCI), lideradu husi José Lucas do Carmo da Silva, dadauk distribui ona produtu Cesta Bázika faze daruak ba komunidade iha Suku Ponilala, Postu administrativu Ermera, Munisípiu Ermera.

Prosesu distribuisaun Cesta bazika ba suku Ponilala ne'e, implementa husi kompaña Jake Lda ne'ebé hetan kontratu husi Governu.

Benefisiáriu iha suku refere hamutuk 4.906, ne'ebe mai husi aldeia lima hanesan aldeia Cotaheu ho komunidade 1.073, Erohou iha 569, Hatuposi 820, Nunupu 1.037 no aldeia Sacoco iha benefisiáriu hamutuk 1.407.

Tuir komunikadu imprensa ne'ebe fó sai husi Gabinete MTCI iha loron (19/09), husu komunidade Ponilala, ne'ebe naran seidauk tama iha lista, atu hato’o reklamasaun diretamente ba meza iha lokál distribuisaun produtu Cesta Bázika.

Tanba, iha distribuisun ida ne'e, hetan mos partisipa direta husi ekipa monitorizasaun hanesan Komisaun Anti Korupsaun (KAK), Autoridade Munisipal, Konsellu dos País, ho empreza distribuidór inklui ekipa husi MTCI nian.

Distribuisaun Cesta Básica faze dahuluk iha tinan 2021, rezultadu peskiza hatudu programa ne’e fó impaktu pozitivu ba produsaun produtu agríkula iha rai laran ho nia kuantidade ne’ebé mak as kompara ho tinan sira anterior.

Tanba ne’e, governu nia desizaun iha distribuisaun Cesta Bázika faze daruak, maioria produtu tenke mai husi lokál ho pursentu 75%, no restu husi importasaun, hó objetivu atu insentiva komunidade agrikultór atu produz barak liután.  

Programa Cesta Bázika sai hanesan mós faze ida atu bele sirkula moeda iha rai-laran, apoiu komunidade sira nia finanseiru no empreza nia átividade negósiu.

Tinan-2022, MTCI mos hala'o lansamentu distribuisaun iha fulan-juñu husi Suku Comoro, Aldeia Baia-Leste, Fomento I to’o Fomento III, Naroman no Aldeia Golgota.

Nune'e mós Suku Ritabou, komunidade ne’ebé mak simu ona sira-nia direitu produtu Cesta Bázika husi aldeia Daetete benefisiáriu hamutuk 573, Uat 905, Ritabou 781, Na’ahui 501, Maganutu 533, Timatan 676, Ritiudu 393, Diruaben 755, Corluli 337, Halecou 661, Moleana 648, Samelaun 948. Husi aldeia 12 ne’e totál 7.711 maka simu ona produtu Cesta Básica.

Distribuisaun produtu Cesta Básica iha suku Poetete, Postu administrativu Ermera Vila, Munisípiu Ermera iha loron-30 juñu 2022, husi kompaña Betuhei, husi aldeia 12 hanesan Tidibisi 325 benefisiariu, Lequisi 1.826, Loblala 678, Biluli 1.368, Poepun 785, Taklela 1.442, Rematu 744, Samatrae 1.451, Urleteho 1.094, Villa 966, Urluli 636 no Gueguemara 441. Husi dadus ne’e populasaun hamutuk 11.768 benefisiáriu maka simu ona produtu Cesta Básica no iha komunidade hamutuk 1.010 mak reklama sira nia direitu.

Alende distribuisaun Cesta básica iha aldeia Baia-Leste, Fomento 1 to’o Fomento 3, aldeia Naroman no aldeia Golgota distribui husi kompaña Leader, no suku Dato responsavel ba distribuisaun husi empreza Hanaroman Brilliant. Husi suku haat ne’ebé mak distribui ona, sei hein lista validasaun husi Ministériu Administratasaun Estatal.

Implementasaun programa Cesta-Bázika ba faze daruak bazeia ba Dekretu lei nú. 10/2022 04 de março, Ministériu Turismu Komérsiu no Indústria, no Sekretária Estadu Koperativa (SEKOOP) nu’udar entidade implementador programa Cesta Bázika, bazeia ba kordenasaun husi Ministeru Kordenador Asuntu Ekonómiku (MEKAE). (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items