"Ha’u apela ba emprezariu sira favor ida labele gasta osan kuandu seidauk iha kontratu labele halo obra ruma, tanba baze legal ba governu atu selu mak kontratu ne'e, lae difikulta fali governu atu rezolve," dehan MOP, Abel Pires hafoin partisipa iha sesaun solene abertura V lejislatura iha Parlamentu Nasional, kinta (15/09).
Nia haktuir, iha tinan hirak liu-ba projetu hamutuk 143 no 99 mak iha kontratu ho governu, alende ne’e 44 la iha kontratu ho governu, nune’e difikulta governu atu halo pagamentu.
"Ita tenta nafatin atu resolve, maibé susar tanba ita nia emprezáriu sira ne'e implementa projetu sein kontratu ruma ne’ebé husu emprezáriu sira atu la'o tuir prosesu sira ne’ebe mak iha, nune'e bele fasilita governu atu apoiu sira," tenik nia
Nia dehan, governu sei halo pagamentu de'it ba kompaña ne'ebé tuir rekézitu no implementasaun tenki liu prosesu aprovizionamentu tuir lei haruka.
"Iha emprezáriu barak mai ko’alia no ha’u esplika ba sira katak, ita nia prosesu sira ne’e tenki la’o tuir lei haruka, tanba ne’e implementa desde tinan 2018 kedas, tanba ne’e husu nafatin ba esprezariu sira maske iha kapasidade atu kontribui ba dezenvolvimentu, maibé tenki la’o tuir nia regras, hanesan atu kaer projetu ruma tenki la’o tuir prosesu aprovizionamentu ne’ebe mak iha, labele idak-idak ba loke estrada halo ponte depois selebra kontratu, ne’e difisil oituan," nia relata
Governu liu husi Konselu Adminstrasaun Fundu Infraestrutura (KAFI) halo ona deliberasaun, nune’e legal sira bele buka solusaun projetu hamutuk 44 ne’ebé seidauk halo pagamentu. (*)