Login to your account

Username *
Password *
Remember Me

Proposta OJE 2023 Governu Aprova Biliaun US$3.1

Ministru Finansas, Rui Augusto Gomes. Ministru Finansas, Rui Augusto Gomes. Foto Tempo Timor

Tempotimor (Dili)-Ministru Finansas, Rui Augusto Gomes aprezenta proposta Orsamentu Jerál Estadu (OJE) tinan 2023 ho montante biliaun US$3.1 no hetan ona Aprovasaun husi Konsellu Minístru.

Tuir Informasaun ne'ebé www.tempotimor.com asesu iha pájina Ministériu Finansas, kinta (15/09), montante globál billiaun US$3,1 ne’e hetan redusaun 8% ka millaun US$264 kompara ho OJE Retifikativu 2022 ne’ebé Governu sei distribui ba Entidades Estadu hamutuk 109 ne’ebé mak hola parte iha perímetru orsamentál 2023.

Totál despesa globál ho montante billiaun US$3,1 ne’e kompostu husi Orsamentu Administrasaun Sentrál billiaun US$2,8 (montante ne’e inklui ona Fundu Kombatentes Libertasaun Nasionál, billiaun US$1). Orsamentu Seguransa Sosiál hetan alokasaun millaun US$235,7 no RAEOA millaun US$120.

Montante despesa globál iha PPL OJE 2023 hanesan mós ho montante despesa globál iha Lei das Grandes Opções do Plano 2023 ne’ebé mak Prezidente Repúblika, José Ramos-Horta promulga ona iha fulan-juñu liubá.

Proposta OJE 2023 ne’e, sei uza hodi finansia programa 49 ho medidas prinsipál 275, organizadu iha área estratéjiku 16 ne’ebé Governu sei foku ba iha tinan oin: Agrikultura, Pekuária, Peskas no Floresta; Ekonomia no Empregu; Turizmu; Dezenvolvimentu Rural no Abitasaun; Ambiente; Petróleu no Minerál; Eletrisidade no Enerjia Renovável; Konektividade Nasionál; Bee no Saneamentu; Edukasaun no Formasaun; Saúde; Inkluzaun no protesaun Sosiál; Kultura no Patrimóniu; Reforma Estadu; Defeza no Seguransa Nasionál; Relasaun Internasionál no Polítika Esterna.

Distribuisaun Tetu Agregardu Orsamentu Administrasaun Sentrál ba OJE 2023 bazeia ba setór importante sira iha Planu Estratéjiku Dezenvolvimentu: Setór Kapitál Sosiál ne’ebé inklui Saúde, Edukasaun no Protesaun Sosiál hetan alokasaun millaun US$771,7 ka 36%. Tuir kedan ho Setór Kuadru Institusionál ho orsamentu alokadu millaun US$706,1 ka 33%. Dezenvolvimentu Infraestrutura ho orsamentu alokadu millaun US$380,3 ka 18% no Dezenvolvimentu Ekonómiku ho orsamentu alokadu millaun US$230,6 ka 11%.

Iha Proposta OJE 2023, Governu mós propoin ba Parlamentu Nasionál orsamentu ba Programa Nutrisaun ho montante millaun $10. Ida-ne’e reprezenta aumentu 𝑞𝑢𝑎𝑡𝑟𝑜 𝑣𝑒𝑧𝑒𝑠 ka porsentu atus-haat (400%) kompara ho orsamentu alokadu ba programa Nutrisaun iha OJE 2022.

Ba oin, Governu ofisialmente sei entrega PPL OJE 2023 ba Parlamentu Nasionál iha loron 3 fulan-outubru atu diskute no aprova iha fulan-novembru nia laran molok haruka ba Prezidente Repúblika atu tetu iha tinan ida-ne’e nia rohan.

Kalendáriu ne’e, tuir ona espíritu Lei Foun Enkuadramentu Orsamentál ne’ebé mak promulga husi Prezidente Repúblika, Francisco Guterres Lu Olo iha fulan-fevereiru liubá. Lei estruturante ne’ebé sai nu’udar baze ida ba Reforma Jestaun Finanseira Públikas iha Timor-Leste, konkista importante ida ne’ebé mak Oitavu Governu Konstitusionál lideradu husi Primeiru Ministru (PM) ,Taur Matan Ruak halo durante nia mandatu. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« December 2022 »
Mon Tue Wed Thu Fri Sat Sun
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31  

Tempo Timor Networks

Online Counter